O‘zbekiston motorli qayiq sporti bo‘yicha o‘z mavqeini mustahkamlash niyatida. Milliy olimpiya qo‘mitasida (MOQ) yirik xalqaro musobaqalarni tashkil etishda katta tajribaga ega “H2O Management Ltd” kompaniyasi delegatsiyasi hamda Rossiya motorli qayiq sporti federatsiyasi vakillari bilan uchrashuv bo‘lib o‘tdi.

Sport vaziri Adham Ikromov va MOQ Bosh kotibi Oybek Qosimov mehmonlar bilan O‘zbekistonda suv-motosport va akvabikeni rivojlantirish istiqbollarini muhokama qildi. Mamlakatimiz hududida ushbu sport turlari bo‘yicha xalqaro musobaqalarni tashkil etish asosiy masalalardan biri bo‘ldi.

Mutaxassislarning fikricha, H2O Management Ltd. bilan hamkorlik O‘zbekistonda suv-motosportini rivojlantirish, sarmoyalarni jalb qilish va ushbu ajoyib fanlarga qiziqishni oshirishda yangi bosqichning boshlanish nuqtasi bo‘lishi mumkin.