O‘zbekiston delegatsiyasi 4-5 fevral kunlari Moskvaga tashrif buyurib, Rossiyaning asosiy vazirliklarida, jumladan, ichki ishlar, tashqi ishlar, sog‘liqni saqlash, iqtisodiy rivojlanish, fan va oliy ta’lim vazirliklari bilan uchrashuvlar o‘tkazdi. Shuningdek, Federal mehnat va bandlik xizmati hamda poytaxt hukumati vakillari bilan muzokaralar bo‘lib o‘tdi.

Muzokaralar markazida mehnat migratsiyasi masalalari va O‘zbekiston fuqarolarining Rossiyada bo‘lish sharoitlarini yaxshilash choralari turdi. Ushbu yo‘nalishlarda hamkorlik qilish, jumladan, O‘zbekiston fuqarolarini Rossiyada ishga joylashtirishdan oldin ularni tashkillashtirilgan holda ishga qabul qilish va kasbiy tayyorlash tizimini takomillashtirish bo‘yicha kelishuvlarga erishildi.

Ustuvor yo‘nalishlardan biri ruxsat beruvchi hujjatlarni olish tartibini O‘zbekiston hududiga ko‘chirishni tezlashtirish bo‘ldi. Rossiya tomoni joriy yilning 30 apreliga qadar amal qiladigan Rossiya Federatsiyasi Prezidentining farmoniga muvofiq O‘zbekiston fuqarolarining huquqiy maqomini qonuniylashtirish jarayonini qo‘llab-quvvatlashga tayyorligini bildirdi. Chet ellik ishchilarni tashkillashtirilgan holda jalb qilish bo‘yicha «Yagona operator‘ni tashkil etish va imtiyozli shartlarni joriy etish, masalan, patent to‘lovini ish beruvchi tomonidan qoplash muhim qadam bo‘ladi.

Bundan tashqari, tomonlar axborot makonida migrantlar haqidagi noto‘g‘ri ma’lumotlar tarqalishiga qarshi kurashish choralarini muhokama qildilar.

4 fevral kuni O‘zbekiston elchixonasida Rossiyaning yirik ish beruvchilari ishtirokida forum o‘tkazildi. Tadbir doirasida 3 mingdan ortiq O‘zbekiston fuqarolarini tashkillashtirilgan holda ishga qabul qilishni nazarda tutuvchi to‘rtta bitim imzolandi.