Moskva shahrida o‘tayotgan “Transport haftaligi-2024” doirasida O‘zbekiston transport vaziri Ilhom Mahkamov va Rossiya transport vaziri Roman Starovoyt uchrashuv o‘tkazdi. Muzokaralarning asosiy mavzusi temiryo‘l infratuzilmasi sohasidagi qo‘shma loyihalar hamda Kaspiy dengizi orqali yangi yo‘nalishlardan foydalanish istiqbollari bo‘ldi. 

Uchrashuv davomida tomonlar mamlakatlar o‘rtasidagi iqtisodiy aloqalarni mustahkamlash va tranzit salohiyatini oshirishga qodir bo‘lgan transport tarmog‘ini rivojlantirish masalalariga alohida e’tibor qaratdi. Muzokaralar yakunida temiryo‘l infratuzilmasini qurish va modernizatsiya qilish sohasida yaqindan hamkorlikni nazarda tutuvchi o‘zaro anglashuv memorandumi imzolandi. 

“Transport haftaligi-2024” Rossiya Transport vazirligi tomonidan o‘n yettinchi bor o‘tkazilmoqda. Tadbir doirasida “Transport-2024” forumi va ko‘rgazmasi ham tashkil etilgan bo‘lib, unda transport sohasini rivojlantirishning dolzarb masalalari muhokama qilinmoqda.