Bryusselda O‘zbekiston tahliliy markazlari delegatsiyasi EGMONT Qirollik xalqaro munosabatlar instituti bosh direktori Pol de Vitt bilan uchrashdi. Bu haqda «Dunyo» axborot agentligi xabar berdi.

Muzokaralar davomida Markaziy Osiyo xalqaro instituti direktori Javlon Vahobov Markaziy Osiyoning xalqaro siyosatdagi ahamiyati tobora ortib borayotganini ta’kidladi. U mintaqa o‘ndan ortiq ko‘p tomonlama «MO+» formatlari doirasida 40 dan ziyod mamlakat va ikkita mintaqaviy tashkilot bilan faol aloqada ekanligini qayd etdi.

EGMONT bosh direktori Pol de Vitt Markaziy Osiyo global maydonda mustaqil ishtirokchi maqomini egallab borayotganini aytdi. Uning fikricha, Yevropa Ittifoqi ushbu mintaqa bilan ikki va ko‘p tomonlama munosabatlarni yanada faolroq rivojlantirishi lozim.

Muzokaralarda O‘zbekistonning yetakchi tahliliy markazlari, jumladan, Iqtisodiy tadqiqotlar va islohotlar markazi, Markaziy Osiyo xalqaro instituti, Strategik va mintaqalararo tadqiqotlar instituti hamda O‘zbekiston Tashqi ishlar vazirligi huzuridagi Tashqi siyosiy tadqiqotlar markazi vakillari ishtirok etdi.

Tomonlar Markaziy Osiyoning zamonaviy rivojlanish tendensiyalari, uning tashqi aloqalari va «Markaziy Osiyo — Yevropa Ittifoqi» formatidagi hamkorlik istiqbollarini muhokama qildilar.