Muzli basseyn, qo‘lbola bolidlar va boshni aylantiruvchi sakrashlar — Toshkent viloyatidagi “Amirsoy Resort” umummavsumiy tog‘ kurortida “Red Bull Jump & Freeze” qiziqarli musobaqasi bo‘lib o‘tdi.

Ekstremal jamoalar qorli yonbag‘irdan to‘g‘ridan-to‘g‘ri muzdek suvga tushishdi, ammo buni shunchaki qilishmadi: ularni tezlik, fokuslarning ta’sirchanligi va kostyumlarning o‘ziga xosligi uchun baholashdi. “CO2 ovchilari” jamoasi g‘olib bo‘ldi.

Red Bull Jump & Freeze — bu noyob tanlov bo‘lib, unda ishtirokchilar nafaqat sovuqqa qarshi chiqadilar, balki ijodiy yondashuvni ham namoyish etadilar. Jamoalar sakrashdan oldin tezlashadigan qo‘lbola transport vositalari shouning asosiy elementiga aylanadi. Bu safar hakamlar va tomoshabinlarni hayratga solgan “CO2 ovchilari” vazifani eng yaxshi uddalashdi:

— Biz uzoq tayyorgarlik ko‘rdik, ammo so‘nggi lahzada butun konsepsiyani qayta ko‘rib chiqishga to‘g‘ri keldi, — deydi jamoa sardori Ruslan Denisov. — Aslida biz «bolid‘imizni bir kechada yig‘ib oldik. Shunga qaramay, biz g‘alaba uchun yo‘l oldik va ishtirok etishdan ulkan zavq oldik. Barchangizga keyingi yilda o‘z kuchingizni sinab ko‘rishni tavsiya etamiz!

Jamoalarning chiqishlari obro‘li hakamlar hay’ati tomonidan baholandi. Uning tarkibiga Abstract Visual Studio video ishlab chiqarish studiyasi asoschisi Bekzod Abduvaliyev, The Telegraph talqiniga ko‘ra “o‘zbek tog‘lari afsonasi” Grigoriy Trebisovskiy, O‘zbekistondagi birinchi xalqaro moda fakulteti rahbari Saidazim Fozilov, bloger Georgiya Malikova va Alisher Navoiy nomidagi Davlat akademik katta teatri prima-balerinasi Nodira Hamroyeva kirdi.

Ulkan tadbir qishki ekstrim va g‘ayrioddiy o‘yin-kulgi ishqibozlari uchun haqiqiy bayramga aylandi. Shov-shuvni hisobga olgan holda, Red Bull Jump & Freeze kelgusi yilda yanada ko‘proq ishtirokchi va tomoshabinlarni to‘plashini kutish mumkin.

Manba: https://caravan-info.uz