Hukumatning yangi qarori qashshoqlikni qisqartirish dasturiga kiritilgan, uy-joy sharoitlarini yaxshilashga muhtoj bo‘lgan shaxslarga ipoteka berish tartibini belgiladi.

Endi bunday fuqarolar uy-joy qurish, rekonstruksiya qilish va ta’mirlash uchun asosiy stavkadan 4 foiz punktga yuqori bo‘lgan stavkada 20 yilgacha muddatga 120 million so‘mgacha ipoteka krediti olishlari mumkin. Kreditlashning dastlabki besh yilida kredit summasining 15 foizini hamda foiz to‘lovlarining 12 foizdan oshgan qismini qoplash uchun subsidiya beriladi.

Bundan tashqari, ushbu dasturga kiritilgan shaxslar kadastr pasportini rasmiylashtirish va ko‘chmas mulkni ro‘yxatdan o‘tkazishda 50 foizlik chegirmaga ega bo‘ladilar.

Shuningdek, yakka tartibdagi uy-joylarni qurish, rekonstruksiya qilish va ta’mirlash uchun ajratiladigan ipoteka kreditlari bo‘yicha boshlang‘ich badal va foiz xarajatlarining bir qismini qoplash uchun subsidiyalar subsidyplatform.mf.uz to‘lov platformasi orqali taqsimlanadi.