O‘zbekistonda metapnevmovirus infeksiyasi holati qayd etilgani Sog‘liqni saqlash vazirligi tomonidan ma’lum qilindi. Biroq, mutaxassislar ta’kidlashicha, bu xavotirlanishga asos bo‘lmaydi, chunki bu dunyoda ilk bor 2001-yilda aniqlangan mavsumiy kasallikdir. Mamlakatimizda metapnevmovirus O‘RVI holatlarining atigi 1,2 foizida aniqlanmoqda. Kasallik odatda oddiy shamollash belgilari bilan kechadi, ayrim hollardagina bronxiolit yoki zotiljamga olib kelishi mumkin, ammo ko‘p hollarda jiddiy oqibatlarga sabab bo‘lmaydi.

Rossiya Sog‘liqni saqlash vazirligining yuqumli kasalliklar bo‘yicha bosh mutaxassisi Vladimir Chulanovning aytishicha, 5 yoshgacha bo‘lgan bolalar, 65 yoshdan oshganlar va immunitet tanqisligidan aziyat chekadigan shaxslarda infeksiyaning og‘ir kechishi xavfi yuqori. Katta yoshdagilar odatda infeksiyani yengil shaklda yoki belgilarsiz o‘tkazadi.

Metapnevmovirusning tipik belgilari orasida yo‘tal, burun bitishi, tumov, tana haroratining ko‘tarilishi, nafas qisilishi va ovozning bo‘g‘iqligi bor.