O‘zbekistonda Xalqaro valyuta jamg‘armasi (XVJ) va Jahon banki tomonidan o‘tkaziladigan Moliyaviy sektorni baholash dasturi (FSAP) ishga tushirildi. Dastur doirasida Markaziy bankda mazkur tashkilotlar mutaxassislari bilan uchrashuv o‘tkazildi.

Markaziy bank raisi Mamatqul Nurmuratov ushbu dastur mamlakatimiz moliya sektorining barqarorligini tahlil qilish va uni yanada rivojlantirish uchun muhim vosita ekanligini ta’kidladi. XVJ va Jahon banki mutaxassislari guruhi ish jarayonida qonunchilik me’yorlarini, to‘lov tizimini hamda bank va nobank tashkilotlarning barqarorligini o‘rganadi. Dastur doirasida moliyaviy tizimning inqirozlarga bardoshliligi va tartibga soluvchi organlarning uni samarali qo‘llab-quvvatlash imkoniyatlarini baholash maqsadida stress-testlar va tizimli xatarlar tahlili o‘tkaziladi.

Dasturda Markaziy bank, Iqtisodiyot va moliya vazirligi, Istiqbolli loyihalar milliy agentligi, shuningdek, tijorat banklari va boshqa idoralar ishtirok etmoqda. 1999-yilda boshlangan bu tashabbus mamlakatning moliyaviy barqarorligi va moliya tizimini rivojlantirish ehtiyojlarini har tomonlama baholashga qaratilgan. XVJ barqarorlikka e’tibor qaratsa, Jahon banki tizimni rivojlantirishga e’tibor beradi. Dastur yakunida O‘zbekiston moliya sektorini mustahkamlash bo‘yicha islohotlar va chora-tadbirlar yuzasidan tavsiyalar ishlab chiqiladi.