“Chirchiq” poligonida Mudofaa vazirligida xizmat o‘tayotgan muddatli harbiy xizmatchilar o‘rtasida armiya o‘yinlari start oldi. Musobaqa “Men g‘olibman!” shiori ostida o‘tkazilib, kelajakda harbiy xizmatni davom ettirish uchun eng yaxshi nomzodlarni saralashga qaratilgan.

O‘yinlar sog‘lom raqobat muhitini yaratish, nazariy va amaliy ko‘nikmalarni takomillashtirish, shuningdek, harbiy xizmatchilar o‘rtasida jangovar ruh va hamjihatlikni mustahkamlash orqali askarlarning kasbiy tayyorgarligini oshirishga xizmat qiladi.

O‘yinlarning ochilish marosimi Mudofaa vazirligining yuqori lavozimdagi zobitlari, Qurolli Kuchlar faxriylari va mehmonlar ishtirokida o‘tkazildi. Ular barchasi “Vatan muqaddas, uni himoya qilish — sharafli burch!” tamoyili asosida o‘tkazilayotgan musobaqalarda ishtirokchilarga muvaffaqiyatlar tilashdi.

Musobaqa 25 ta turli yo‘nalishni qamrab olgan bo‘lib, unda harbiy xizmatchilarning kasbiy mahorati, chaqqonligi, aqliy qobiliyati va ma’naviy-ruhiy barqarorligi sinovdan o‘tkaziladi. Qizg‘in kurash davomida jamoalarning topshiriqlarni bajarishdagi hamjihatligi, ishtirokchilarning jismoniy va ruhiy tayyorgarligiga alohida e’tibor qaratiladi.