Dehqonobod davlat o‘rmon xo‘jaligida 104 ta Zarafshon archasining noqonuniy kesilishi holatlari qayd etilgan. Qoidabuzarliklar Ekologiya, atrof-muhitni muhofaza qilish va iqlim o‘zgarishi vazirligi tasarrufidagi “Duob” o‘rmon xo‘jaligi hududida aniqlangan.

Aniqlangan holatlardan biri fuqaro K.M. tomonidan uchta daraxtning noqonuniy ravishda yo‘q qilinishi bo‘ldi. Unga jarima jazosi tayinlandi va yetkazilgan zararni qoplash summasi 51,8 million so‘mni tashkil etdi. Mazkur holat yuzasidan Fuqarolik ishlari bo‘yicha G‘uzor tumanlararo sudiga da’vo arizasi yuborildi. Bundan tashqari, xizmat vazifalarini lozim darajada bajarmaganligi uchun “Duob” o‘rmon xo‘jaligi 4-bo‘limining sobiq rahbari va o‘rmonchiga ma’muriy jarimalar qo‘llanildi.

Shuningdek, noma’lum shaxslar tomonidan 38 ta archa kesilgani aniqlanib, yetkazilgan zarar 94,3 million so‘mga baholandi. Voqea uchun javobgarlik o‘rmonchi X.E.ga yuklatildi va unga takroriy ma’muriy jarima tayinlandi. Ish materiallari sudga topshirildi.

Qoidabuzarliklar “Duob” o‘rmon xo‘jaligi 3-bo‘limining chegara zonasida ham qayd etildi. Bu yerda 6 ta daraxt noqonuniy yo‘q qilinib, 41,4 million so‘m zarar yetkazildi. Mazkur holat yuzasidan o‘rmonchi R.B. ma’muriy javobgarlikka tortilib, materiallar sudga berildi.

Bundan tashqari, mazkur tumanda fuqaro X.A. 8 ta daraxtni noqonuniy ravishda kesib, 25,3 million so‘m zarar yetkazdi. Unga nisbatan ham ma’muriy jazo qo‘llanilib, ish materiallari sudga yuborildi.

Tabiatga eng ko‘p zararni 49 ta archa daraxtini yo‘q qilgan noma’lum shaxslar yetkazdi. Zararning umumiy miqdori 176,5 million so‘mga yetdi. Ish Dehqonobod tuman prokuraturasiga topshirildi.