Oliy Majlis Qonunchilik palatasi soliq qonunchiligini takomillashtirish va tadbirkorlik subyektlarining huquqiy kafolatlarini kuchaytishga qaratilgan qonun loyihasini birinchi o‘qishda qabul qildi. Kiritilgan o‘zgartirishlar nafaqat biznes uchun qulay shart-sharoitlar yaratish, balki jinoyat ishlari bo‘yicha sud jarayonida tadbirkorlarning himoyasini oshirish orqali soliqqa oid huquqbuzarliklarning oldini olish imkonini ham beradi.

Hujjatda soliqqa oid huquqbuzarliklar uchun hisoblangan summalar tergov organlarining depozit hisobvarag‘idan davlat byudjetiga o‘tkazilgunga qadar jarima hisoblanmasligi nazarda tutilgan. Shuningdek, yer uchastkalarini jamoat ehtiyojlari uchun olib qo‘yganlik evaziga to‘lanadigan kompensatsiya mulkdorning soliq daromadiga kiritilmasligi to‘g‘risidagi norma taklif etilmoqda.

O‘zbekiston Prezidenti huzuridagi Tadbirkorlar huquqlarini himoya qilish bo‘yicha vakil hamda Savdo-sanoat palatasining tadbirkorlik subyektlariga nisbatan qo‘zg‘atilgan jinoiy ishlarda jamoat himoyachisi sifatidagi roli belgilanishi muhim qoidalardan biri bo‘ldi.

Bundan tashqari, agar tadbirkor birinchi marta soliqqa oid jinoyat sodir etib, tergov yoki birinchi instansiya sudida davlatga yetkazilgan zararni to‘liq qoplagan bo‘lsa, javobgarlikdan ozod qilinadi. Soliqlarni to‘lashdan qasddan bo‘yin tovlaganlik uchun qarzdorlik to‘liq qoplangan taqdirda, ozodlikdan mahrum qilish jazosi qo‘llanilmaydi.

Hujjatda soxta tadbirkorlikka qarshi kurashga ham e’tibor qaratilgan. Qonun loyihasining 179-moddasida noqonuniy foyda olish uchun foydalaniladigan soxta firmalarni tashkil etganlik uchun jarima miqdorini oshirish ko‘zda tutilgan. Faqatgina 2024-yilning o‘zida O‘zbekistonda 516 ta shunday kompaniya aniqlangan bo‘lib, ular orqali 4,7 trillion so‘m mablag‘ o‘tkazilgan.