25 aprel kuni Bangkokda o‘tkazilayotgan dzyudo bo‘yicha Osiyo chempionatining birinchi kunida o‘zbekistonlik dzyudochi Zamaxshari Bekmurodov 66 kilogramm vazn toifasida kumush medalni qo‘lga kiritdi. Bekmurodov finalda amaldagi jahon va qit’a chempioni yaponiyalik Ryoma Tanaka bilan uchrashdi va qo‘shimcha vaqtda unga imkoniyatni boy berdi. Bekmurodov o‘tgan yili aynan shu vazn toifasida yoshlar o‘rtasida qit’a chempioni bo‘lgan edi. Bangkok shahrida o‘tkazilayotgan Osiyo chempionatida 23 davlatdan 220 nafar dzyudochi 15 medallar jamlanmasi uchun kurash olib bormoqda. Tanlov 28 aprelga qadar davom etadi.