Bugun TASSda (Sankt-Peterburg) 4-9 aprel kunlari bo‘lib o‘tadigan “Rossiyadagi uchrashuvlar” XXVII rus teatrlari festivaliga bag‘ishlangan matbuot anjumani o‘tkaziladi. Tadbirda O‘zbekiston davlat akademik rus drama teatri ham qatnashadi.

Sankt-Peterburg madaniyat qo‘mitasi raisi Fedor Boltin, festival rahbari, “Boltiq uyi” teatr-festivali bosh direktori Sergey Shub, festival badiiy rahbari Marina Belyayeva va G.A. Tovstonogov nomidagi Katta drama teatri direktori Tatyana Arxipova festival mavzusi va dasturi, ishtirokchilar geografiyasi hamda K.Yu. Lavrov nomidagi “Rus madaniyatini qo‘llab-quvvatlash va targ‘ib qilish uchun” xalqaro mukofoti haqida ma’lumot beradilar.

Matbuot anjumaniga Rossiya prezidentining xalqaro madaniy hamkorlik bo‘yicha maxsus vakili Mixail Shvidkoy va ishtirokchi teatrlar direktorlari, jumladan, O‘zbekiston davlat akademik rus drama teatri direktori Oleg Vasilev videoaloqa orqali qo‘shiladilar.

Festival doirasida turli mamlakatlarning rus teatrlari spektakllari namoyish etilib, chet eldagi rus madaniyatining rang-barangligi va boyligi namoyon bo‘ladi.

Eslatib o‘tamiz, 2-mart kuni A.P. Chexov nomidagi Samarqand viloyat rus drama teatri Dmitriy Danilovning “Kecha kechqurun nima qildingiz?” pyesasi asosida sahnalashtirilgan spektakl premerasini taqdim etgan edi. Ushbu postanovka Rossiya teatr arboblari ittifoqining Chet eldagi rus teatrini qo‘llab-quvvatlash markazi tomonidan o‘tkazilgan rejissyorlik laboratoriyasi natijasi bo‘ldi.

Manba: https://caravan-info.uz/