Guanchjou (Xitoy) shahrida Xalqaro sport klublari assotsiatsiyasi tomonidan Bosh konsullik va Xitoyning “Yingxiong” sport klubi hamkorligida tashkil etilgan badiiy gimnastika bo‘yicha “EAST CUP & OLYMPIC STARS” nufuzli xalqaro turniri yakunlandi.

O‘zbekistonlik gimnastikachilar Xitoy, Vyetnam, Avstraliya, Armaniston, Rossiya, Turkmaniston, Qozog‘iston kabi 11 davlatdan 200 nafardan ortiq sportchini ortda qoldirib, yuksak natijalarni namoyish etdi.

Danika Mun va Safina Yandasheva yakkalik bahslarida oltin medalni qo‘lga kiritib, mutlaq g‘olib bo‘ldi. 2015-2016-yillarda tug‘ilgan sportchilardan tashkil topgan O‘zbekiston ayollar terma jamoasi ham raqiblariga hech qanday imkoniyat qoldirmadi va jamoaviy birinchi o‘rinni ishonchli tarzda egalladi.

2021-yildan buyon o‘tkazib kelinayotgan EAST CUP & OLYMPIC STARS turniriga avvalroq Toshkent va Moskva mezbonlik qilgan. Tadbir doirasida Xalqaro sport klublari assotsiatsiyasining 3-Kongressi ham bo‘lib o‘tdi va unda Vetnam, Avstraliya, BAA klublari bilan hamkorlikni kengaytirish masalalari hamda sportni rivojlantirish istiqbollari muhokama qilindi. G‘olib va sovrindorlar tashkilotchilar va homiylarning qimmatbaho sovg‘alari bilan taqdirlandi.