O‘zbekiston Prezidenti Shavkat Mirziyoyev va Malayziya Bosh vaziri Anvar Ibrohim Kuala-Lumpurdagi Petronas korporatsiyasi bosh qarorgohiga tashrif buyurishdi. U yerda ular kompaniya prezidenti Muhammad Tavfiq bilan o‘zaro manfaatli hamkorlikni kengaytirish masalalarini muhokama qildilar. Neft-gaz sanoati, neft-kimyo va qayta tiklanadigan energetika sohasida yetakchilardan biri hisoblangan Petronas O‘zbekistonda istiqbolli loyihalarni ko‘rib chiqmoqda.
O‘zbekiston rahbari xom ashyoni chuqur qayta ishlash va “yashil” energetika sohalaridagi loyihalarni amalga oshirish rejalarini qo‘llab-quvvatlashini bildirdi. Hamkorlikning ustuvor yo‘nalishlari qatoriga geologiya-qidiruv ishlarini olib borish va uglevodorod konlarini o‘zlashtirish kiradi.
Karbonat angidrid gazini tutib qolish va saqlash bo‘yicha ilg‘or texnologiyalarni joriy etish, shuningdek, Petronas universiteti negizida yuqori malakali kadrlar tayyorlash masalalari muhokama etildi. Ushbu uchrashuv O‘zbekiston Prezidentining Malayziyadagi ishbilarmonlik dasturining davomi bo‘ldi.