27-iyun kuni Toshkent shahrida O‘zbekiston Savdo-sanoat palatasi raisi o‘rinbosari Dilshod Rasulov va Pokistonning Glitz Group kompaniyasi direktori Chaudxari Bilol o‘rtasida uchrashuv bo‘lib o‘tdi. Tomonlar farmatsevtika sanoati, jumladan, yuqori qo‘shimcha qiymatli mahsulotlar ishlab chiqarish va mintaqaviy bozorlarga chiqish bo‘yicha ikki tomonlama hamkorlik istiqbollarini muhokama qildi. Glitz Group Pokistondagi yetakchi farmatsevtika xoldingidir. Korxona 650 dan ortiq xalqaro sertifikatlangan dori vositalarini ishlab chiqaradi va ularni 20 dan ortiq mamlakatlarga eksport qiladi. Ishlab chiqarish jarayonlari ISO va cGMP standartlariga mos keladi va DRAP milliy regulyatori tomonidan tasdiqlangan. Bilolning taʼkidlashicha, Oʻzbekistonda farmatsevtika va ozuqaviy mahsulotlar ishlab chiqarish jadal surʼatlarda oʻsmoqda, shuningdek, jozibador sarmoyaviy muhit mavjud. Muzokaralar chog‘ida Glitz Group O‘zbekistonda ishlab chiqarishni yo‘lga qo‘yish rejalarini ma’lum qildi. Bunga javoban Savdo-sanoat palatasi loyihani har tomonlama – ishonchli hamkor tanlashdan tortib, tashkiliy masalalarni hal etishgacha qo‘llab-quvvatlashga tayyorligini bildirdi. Uchrashuv yakunida qoʻshma korxona tashkil etish va hududiy eksport uchun yuqori qoʻshimcha qiymatli mahsulotlar ishlab chiqarish boʻyicha kelishuvga erishildi.