O‘zbekiston Respublikasi Prezidenti Shavkat Mirziyoyev Malayziyaning eng yirik muzey fondlaridan biri — 1998-yilda asos solingan Islom san’ati muzeyiga tashrif buyurdi. An’anaviy islom me’morchiligi uslubida qurilgan ushbu muzey 30 ming kvadrat metrdan ortiq maydonni egallab, chinakam madaniy meros xazinasiga aylangan.

Muzey kolleksiyasida 10 mingdan ziyod noyob ashyolar, jumladan, to‘plangan Qur’on qo‘lyozmalari, sopol buyumlar, zargarlik buyumlari, qurol-yarog‘ namunalari, ulug‘vor inshootlar maketlari va turfa xil bezaklar mavjud. Hozirgi O‘zbekiston hududida turli tarixiy davrlarda yaratilgan 200 ga yaqin noyob eksponatlar alohida e’tiborni tortadi. Ular orasida o‘rta asr qo‘lyozmalari, nafis zargarlik buyumlari, mashhur abr matolari va Sharq Uyg‘onish davri sopol buyumlari bor.

Muzey gumbazining ichki bezagi va olib borilayotgan ta’mirlash ishlarida o‘zbek ustalari ishtirok etgan, bu esa mamlakatlar o‘rtasidagi yaqin madaniy aloqalarni ko‘rsatib turibdi. Shavkat Mirziyoyev eksponatlarni ko‘zdan kechirish chog‘ida qo‘shma tadqiqotlar va ko‘rgazma tadbirlarini tashkil etish muhimligiga, xalqlar o‘rtasidagi madaniy va ilmiy almashinuvni kengaytirish zarurligiga alohida e’tibor qaratdi.