Shavkat Mirziyoyevga avtomobil sanoatining joriy holati va rivojlanish istiqbollari haqida ma’lumot berildi. Bu soha mamlakatimiz sanoatining o‘n foizini tashkil etadi.

Joriy yilning o‘n oyida 338 ming dona yengil avtomobil ishlab chiqarildi, 1400 turdagi butlovchi qismlar mahalliylashtirilib, iqtisodiy choralar tufayli ishlab chiqarish tannarxi 4 foizga pasaydi. Eksport hajmi 455 million dollarni tashkil etdi.

“O‘zavtosanoat” aksiyadorlik jamiyati raisi 2025-yilgacha mo‘ljallangan rejalarni taqdim etdi. Kelgusi yilda 450 ming dona avtomobil ishlab chiqarish, eksportni esa 700 million dollarga yetkazish ko‘zda tutilmoqda. Mahalliylashtirish darajasini oshirish asosiy yo‘nalishga aylanadi. 325 million dollarlik 63 ta loyihani amalga oshirish orqali 700 ta yangi detal ishlab chiqarishni o‘zlashtirish rejalashtirilmoqda.

Elektromobillar ishlab chiqarishni rivojlantirishga alohida e’tibor qaratildi. BYD kompaniyasi bilan hamkorlikda qurilgan Jizzaxdagi yangi zavodda allaqachon Chazor va Song Plus Champion modellari ishlab chiqarilmoqda. Yaqin yillarda modellar qatorini kengaytirish rejalashtirilmoqda. Zavodni rivojlantirishning ikkinchi bosqichida yiliga 200 ming donagacha, uchinchi bosqichda esa 500 ming donagacha elektromobil ishlab chiqarish ko‘zda tutilgan. Loyihaning ikkinchi bosqichida kiritilishi kutilayotgan jami investitsiyalar hajmi 300 million dollarni tashkil etadi.

Prezident xitoylik hamkorlar bilan qo‘shimcha quvvatlar qurish, shuningdek, elektromobillar uchun butlovchi va ehtiyot qismlar ishlab chiqarishni yo‘lga qo‘yish bo‘yicha rejalarni kelishib olishni topshirdi. Qo‘shimcha ravishda, kooperatsiyani mustahkamlash va ishlab chiqarishni mahalliylashtirish darajasini oshirish maqsadida mahalliy korxonalarga buyurtmalar shakllantirishni vazifa qilib qo‘ydi.