Xitoyning Tyantszin shahrida Shanxay hamkorlik tashkilotiga (ShHT) aʼzo davlatlar oʻsimliklar karantini boʻyicha idoralar rahbarlarining ikkinchi yigʻilishi boʻlib oʻtdi. Tadbirda ishtirokchi davlatlarning tegishli idoralari vakillari, jumladan, Qirg‘iziston Respublikasi Suv xo‘jaligi, qishloq xo‘jaligi va qayta ishlash sanoati vazirligining Kimyolashtirish, o‘simliklarni himoya qilish va karantini departamenti xodimlari ishtirok etdi.

Uchrashuvning asosiy mavzulari quyidagilardan iborat edi:

• fitosanitariya tartiblarini uyg‘unlashtirish va ilg‘or tajriba almashish orqali qishloq xo‘jaligi mahsulotlarining xalqaro bozorlarga chiqishini kengaytirish;
• karantin zararkunandalariga qarshi kurashishning birgalikdagi mexanizmlarini ishlab chiqish;
• fitosanitariya holati monitoringi va nazoratini tashkil etish;
• fitosanitariya sertifikatlarini elektron almashish tizimini joriy etish;
• fitosanitariya nazoratida zamonaviy intellektual texnologiyalarni qo'llash.

Uchrashuv yakunlari bo‘yicha Ikki tomonlama uchrashuvlar bayonnomasi imzolandi, ShHTga a’zo davlatlarning o‘simliklar karantini bo‘yicha idoralari rahbarlarining Qo‘shma bayonoti qabul qilindi.

Qirgʻiziston tomonining yigʻilishda ishtirok etishi mahalliy qishloq xoʻjaligi mahsulotlarini, ayniqsa, meva-sabzavotlarni Xitoy, Hindiston, Pokiston, Eron va ShHTga aʼzo boshqa davlatlar bozorlariga olib chiqishda muhim ahamiyatga ega. O‘tkazilgan muzokaralar hamkorlikni mustahkamlash, fitosanitariya talablarini uyg‘unlashtirish, eksport tartib-qoidalarini soddalashtirish va qirg‘iz ishlab chiqaruvchilari va eksportchilarining raqobatbardoshligini oshirishga xizmat qilmoqda.