Olmaota, 2025 yil 7-may – IA Caravan Info.Olmaotada Butunjahon stomatologiya federatsiyasi Yevropa bo‘limining yalpi majlisi bo‘lib o‘tdi, unda 48 davlatdan delegatlar ishtirok etdi. Mazkur tarmoq forumi Yevropa va Markaziy Osiyoda stomatologiyani rivojlantirishning dolzarb masalalari, jumladan, og‘iz bo‘shlig‘i kasalliklarini tashxislash va davolashda innovatsion texnologiyalarni qo‘llash, klinik amaliyot aspektlari, jarrohlik aralashuvlar va profilaktikaga zamonaviy yondashuvlarni muhokama qilish uchun muhim maydonga aylandi.

Qozog‘iston Respublikasi Sog‘liqni saqlash vaziri Akmaral Alnazarova o‘zining tabrik so‘zida stomatologiyaning aholi salomatligini shakllantirishdagi muhim rolini ta’kidladi. Uning so‘zlariga ko‘ra, stomatologik holat tananing umumiy holatining asosiy ko‘rsatkichlaridan biri bo‘lib, tish kasalliklarini kamaytirish bo‘yicha chora-tadbirlar ishlab chiqish millat salomatligini mustahkamlashga qaratilgan dasturning ajralmas qismi hisoblanadi. Vazir stomatologlarni bu borada, ayniqsa, profilaktika choralari orqali hamkorlik qilishga chaqirdi.

Akmaral Alnazarova, shuningdek, respublikada maktab yoshidagi bolalarda stomatologik kasalliklarning tizimli profilaktikasi bo‘yicha dastur amalga oshirilayotgani, uning maqsadi dinamik monitoring, barvaqt aniqlash va bolalarga stomatologik yordam ko‘rsatish imkoniyatlarini 80 foizga oshirish orqali bunday kasalliklarning tarqalishini 10 foizga kamaytirishdan iborat bo‘lganligi haqida ham ma’lum qildi.

Qozog‘istonda stomatologiya jadal rivojlanib bormoqda va yaqin va uzoq xorijdagi turli mamlakatlardan kelgan tibbiy sayyohlar uchun tobora jozibador bo‘lib bormoqda. Bugungi kunda AQSh, Germaniya, Eron, Rossiya, MDH davlatlari kabi 37 davlatdan fuqarolar stomatologik davolanish va turli stomatologik muolajalarni o‘tkazish uchun Qozog‘istonga kelayotir, bu esa mamlakatimizda ko‘rsatilayotgan stomatologik yordam sifati yuqoriligidan dalolat beradi.

Foto: Qozog‘iston Respublikasi Sog‘liqni saqlash vazirligi