Ostona, 2025-yil 19-may – Karavan Info axborot agentligi.Qozog‘iston Respublikasi tashqi ishlar vaziri o‘rinbosari Roman Vasilenko Buyuk Britaniya va Shimoliy Irlandiya Birlashgan Qirolligi Davlat kotibining mudofaa bo‘yicha o‘rinbosari lord Vernon Koker bilan uchrashuv o‘tkazdi.

Suhbat chog‘ida Qozog‘iston va Buyuk Britaniya o‘rtasidagi ikki tomonlama hamkorlikning asosiy jihatlari, jumladan, xavfsizlik, mudofaa va tinchlikni saqlash kabi muhim sohalardagi hamkorlik masalalari muhokama qilindi.

Roman Vasilenko britaniyalik hamkasbiga Qozog‘iston Qurolli Kuchlari vakillarining Birlashgan Millatlar Tashkilotining tinchlikparvar missiyalarida ishtirok etishining qimmatli tajribasi va bu yo‘nalishda samarali faoliyat yuritish uchun harbiy kadrlar tayyorlash sohasida xalqaro hamkorlar bilan samarali hamkorlik haqida ma’lumot berdi.

Qozog‘iston Respublikasi tashqi ishlar vaziri o‘rinbosari Qozog‘iston tomoni BMT shafeligida xalqaro tinchlik va barqarorlikni mustahkamlashga yanada salmoqli hissa qo‘shishdan manfaatdorligini tasdiqladi.

Uchrashuvda, shuningdek, dolzarb koʻp tomonlama muammolar hamda mintaqaviy va global kun tartibidagi asosiy mavzular yuzasidan atroflicha fikr almashildi.

Qozog‘iston va Buyuk Britaniya vakillari turli ko‘p tomonlama maydonlarda xalqaro xavfsizlik va hamkorlik kontekstida tomonlarni qiziqtirgan keng ko‘lamli masalalarni muhokama qildilar.

Foto: Qozog‘iston Respublikasi TIV