Viloyat iqtisodiyot va moliya boshqarmasi vakili Davron Rasulovning aytishicha, Urgut va Samarqand tumanlarida 400 gektar maydonda yangi sayyohlik obyektlari qurilmoqda. “Turistik qishloq” konsepsiyasi doirasida qator mahallalarda yetti yo‘nalishda turistik xizmat ko‘rsatish yo‘lga qo‘yilmoqda. Umumiy qiymati 2,1 trillion so‘mlik 30 ta loyiha amalga oshirilib, 3 mingdan ortiq yangi ish o‘rinlari yaratilmoqda. Viloyat 10 ta yangi mehmonxonaga ega bo‘ladi, xonalarning umumiy soni 20 mingtaga etadi. Payariq tumanida “Enter Engineering” kompaniyasi tomonidan qiymati 2 trillion so‘mlik ziyorat turizmi markazi barpo etilib, bu yerda 8 ta mehmonxona va 1200 ta ish o‘rni paydo bo‘ladi. Rejalarda sanatoriylar, savdo-ko‘ngilochar va sog‘lomlashtirish markazlari qurilishi ham ko‘zda tutilgan. Rasmiylar xorijiy sayyohlarning yillik oqimi 2,5 million kishiga yetishini, turistik xizmatlar eksporti esa 600 million dollardan oshishini kutmoqda. Samarqand aeroporti xalqaro reyslar sonini haftasiga 50 tadan 120 tagacha oshiradi. Xususan, Flydubai Dubaydan haftasiga 5 martagacha parvoz qiladi.