Nurobod texnoparkini tashkil etish O‘zbekiston Prezidentining 2025-yil 4-avgustdagi (PQ-243-son) qarori bilan ko‘zda tutilgan bo‘lib, 2030-yilgacha bo‘lgan davrda mintaqada investitsiya muhitini yaxshilash strategiyasining bir qismi hisoblanadi. Rejaga ko‘ra, kelgusi besh yilda Nurobod tumaniga 1,1 milliard dollardan ortiq to‘g‘ridan-to‘g‘ri xorijiy investitsiyalar jalb qilinadi. Bu mablag‘lar ilg‘or va sifatli sanoat mahsulotlari ishlab chiqarish sohasidagi loyihalarni amalga oshirishga yo‘naltiriladi. Shuningdek, texnopark negizida 5 ming 100 dan ortiq doimiy ish o‘rni yaratish rejalashtirilgan. Sanoat zonasi Sazagon massivida 115,3 gektar maydonda barpo etiladi. Bu hudud avvallari “Urgut” erkin iqtisodiy zonasi tarkibiga kirgan boʻlsa, endilikda alohida sanoat maydonchasi tashkil etish maqsadida uning tarkibidan chiqarildi. Texnoparkni yangi zona doirasida infratuzilma va investitsiya loyihalarini amalga oshirish uchun mas’ul bo‘lgan “New Vision Investment Development” MChJ xorijiy kompaniyasi boshqaradi. Nurobod texnoparkining o‘ziga xos xususiyati ko‘p qavatli (3-4 qavatli) ishlab chiqarish binolari qurilishi bo‘lib, bu yer resurslaridan samarali foydalanish va ko‘proq ishlab chiqarish ob’ektlarini bir maydonchada jamlash imkonini beradi. Nurobod texnoparkining tashkil etilishi nafaqat Samarqand sanoat tarmog‘ini modernizatsiya qilish yo‘lidagi qadam, balki xalqaro investorlar uchun ham muhim signaldir. Loyiha yangi texnologiyalarga yo‘l ochadi, ish o‘rinlari yaratadi va mintaqada iqtisodiy o‘sishga turtki beradi.