Butunrossiya “Traditsiya” jurnalida Sankt-Peterburg Tashqi aloqalar qo‘mitasi raisi Yevgeniy Grigorevning intervyusi chop etildi. Unda u shaharning O‘zbekiston bilan hamkorligi haqida batafsil ma’lumot berdi.
Yevgeniy Grigorevning ta’kidlashicha, Markaziy Osiyo, jumladan O‘zbekiston, Rossiyaning eng yaqin ittifoqchilari qatoriga kiradi. U Vladimir Putinning o‘tgan yil may oyida O‘zbekistonga qilgan tarixiy tashrifi ikki tomonlama munosabatlarning yangi ustuvor yo‘nalishlarini belgilab berganiga alohida e’tibor qaratdi.
Grigorev Sankt-Peterburg har doim Rossiya-O‘zbekiston hamkorligining avangardida bo‘lganini ta’kidladi. Ikki mamlakat rahbarlari tomonidan olti yil avval yo‘lga qo‘yilgan Hududlar forumi o‘z samaradorligini tasdiqladi. Sankt-Peterburg O‘zbekistonning sakkizta hududi, jumladan Toshkent, Samarqand va Sirdaryo viloyatlari bilan faol hamkorlik qilmoqda. Hamkorlik yo‘nalishlari iqtisodiyot, sog‘liqni saqlash, madaniyat, turizm va ta’lim sohalarini qamrab oladi.
O‘zbekiston Sankt-Peterburgning eng yirik o‘nta savdo hamkoridan biri hisoblanadi, ular o‘rtasidagi tovar aylanmasi o‘tgan yili 20 foizga o‘sib, 500 million dollarga yetdi. 2024-yil aprel oyida Sankt-Peterburg birinchi marta Toshkentdagi “INNOPROM. Markaziy Osiyo” sanoat ko‘rgazmasida ishtirok etdi, unda Sankt-Peterburgning 20 ta kompaniyasi o‘z loyihalarini taqdim etdi.
Ta’lim sohasi ham o‘zaro hamkorlikning asosiy yo‘nalishi hisoblanadi. O‘tgan o‘quv yilida Sankt-Peterburg oliy ta’lim muassasalarida 6 mingga yaqin o‘zbekistonlik talaba tahsil olgan — bu Xitoydan keyingi ikkinchi ko‘rsatkich. 2023-yil sentyabr oyida Sankt-Peterburgda Rossiya va O‘zbekiston oliy ta’lim muassasalari rektorlarining mintaqalararo konferensiyasi o‘tkazildi.
Tarixiy aloqalarga alohida e’tibor qaratilgan. Ulug‘ Vatan urushi yillarida O‘zbekiston qamal qilingan Leningradga katta yordam ko‘rsatdi, evakuatsiya qilingan bolalar va kattalarni qabul qildi. Ushbu voqea xotirasiga Toshkent shahrida 2025-yilda G‘alaba bog‘i hududida «Leningrad yodgorligi‘ni o‘rnatish rejalashtirilmoqda.
Yevgeniy Grigorev madaniy almashinuv davom etishini ta’kidladi. 2024-yil bahorida Toshkentda Sankt-Peterburg kunlari muvaffaqiyatli o‘tkazilgandan so‘ng, kuzda toshkentlik hamkorlarning Sankt-Peterburgga madaniy dastur bilan tashrifi kutilmoqda.
“O‘zbekiston va Sankt-Peterburgni nafaqat umumiy manfaatlar, balki mustahkamlanib borayotgan chuqur tarixiy do‘stlik ham bog‘lab turadi,” deya xulosa qildi Grigorev.