Ar-Riyodda IT Park Uzbekistan vakolatxonasining tantanali ochilish marosimi bo‘lib o‘tdi. Tadbir The Garage innovatsion maydonida Plug and Play Riyadh ko‘magida o‘tkazildi.

Marosimda so‘zga chiqqan O‘zbekiston raqamli texnologiyalar vaziri Sherzod Shermatov mamlakatlar o‘rtasidagi ikki tomonlama munosabatlar texnologiya sohasida jadal rivojlanayotganini ta’kidladi. U bunday tashabbuslar nafaqat iqtisodiy aloqalarni mustahkamlashga, balki yangi ish o‘rinlari yaratishga va mahalliy mutaxassislarning rivojlanishiga ham xizmat qilishini alohida qayd etdi.

Asosiy hamkorlar, jumladan Plug and Play va Datavolt vakillari, O‘zbekistonning rivojlanayotgan texnoxab sifatidagi salohiyatini ta’kidladilar. Datavolt bosh direktori Rajit Nanda O‘zbekiston texnologiya sektorining tez sur’atlarda o‘sishini va atrof-muhitga zarar yetkazmaydigan ma’lumotlarni qayta ishlash markazlarini yaratish istiqbollarini alohida ta’kidlab o‘tdi.

Tadbir mehmonlariga O‘zbekistondagi startaplar va biznes muhitini qo‘llab-quvvatlash dasturlari, shu jumladan mamlakatning BIBAN-2024 dagi ishtiroki natijalari taqdim etildi. Unda 12 ta o‘zbek startaplari namoyish qilindi.

Ar-Riyodda IT Park vakolatxonasining ochilishi o‘zbek startaplari uchun Fors ko‘rfazi mamlakatlari bozorida yangi imkoniyatlar yaratadi, xorijiy kompaniyalarning Markaziy Osiyoga kirishini osonlashtiradi va IT-biznes uchun xarajatlarni optimallashtirish imkonini beradi.