Senatning Sud-huquq masalalari va korrupsiyaga qarshi kurashish qo‘mitasida ‘Jinoyat ishi yuritilayotganda qamoqda saqlash to‘g‘risida‘gi O‘zbekiston Respublikasi Qonunining 22-moddasiga o‘zgartishlar kiritishni taklif etuvchi qonun loyihasi muhokama qilindi. Hujjat Senatning qonunchilik tashabbusi asosida tayyorlangan.

Muhokamada senatorlar, Oliy sud, Bosh prokuratura, Davlat xavfsizlik xizmati, Ichki ishlar va Adliya vazirliklari, Advokatlar palatasi, Prezident huzuridagi Qonunchilik va huquqiy siyosat instituti vakillari hamda jurnalistlar ishtirok etishdi.

Qonun loyihasi advokatlik faoliyatiga zamonaviy texnologiyalarni joriy etishga qaratilgan. Taklifga ko‘ra, qamoqda saqlanayotgan gumon qilinuvchi va ayblanuvchilarga videokonferensaloqa orqali himoyachi bilan muloqot qilish huquqi beriladi. Ushbu qaror yuridik yordamdan foydalanish imkoniyatini yaxshilaydi va advokatlar ishini osonlashtiradi.

Senatorlar va ekspertlar yangi qonun fuqarolarning huquqlarini himoya qilishga va masofaviy yuridik yordam imkoniyatlarini kengaytirishga xizmat qilishini ta’kidlashdi. Shuningdek, qonun loyihasini xorijiy tajribani hisobga olgan holda takomillashtirish va keng jamoatchilik muhokamasidan o‘tkazish zarurligi qayd etildi.