AFG'ONISTON, 2026-yil 25-fevral – Karavan Info axborot agentligi. Afg'oniston Statistika va axborot bosh boshqarmasi o'tgan oyda aeroportlar va quruqlikdagi chegara o'tish punktlari orqali mamlakatga jami 2918 nafar xorijiy fuqaro kirib-chiqqanini xabar qildi.

Agentlik ma'lumotlariga ko'ra, xorijliklar mamlakatga ish, turizm va qarindoshlarini ziyorat qilish uchun kelgan.

Bayonotda ta'kidlanishicha, ushbu davrda Afg'onistonga 1507 nafar xorijiy fuqaro, jumladan, 52 nafar ayol kelgan, 1411 nafar kishi, jumladan, 24 nafar ayol mamlakatni tark etgan.

Avvalroq, Tolibon vakillari eng ko'p xorijliklar oqimi Nimroz chegara punkti, Hirot aeroporti va o'tish joylari, Torxam va Hayraton o'tish joylari hamda Kobul xalqaro aeroporti orqali o'tganini xabar qilishgan edi.

Ularning so'zlariga ko'ra, bir qator xorijiy sayyohlar Bamyan, Hirot, Qandahor, Nangarhor, G'or, Badaxshon, Kunduz, Paktiya, Xost, Nuriston, Balx, Samangan va Kunar viloyatlaridagi tarixiy joylarga tashrif buyurishgan.

Shu bilan birga, Tolibon vakillari ko'plab Afg'oniston fuqarolari va hukumat tanqidchilari siyosatning qattiqlashishi va qiyin iqtisodiy vaziyat sharoitida mamlakatni tark etishda davom etayotganiga qaramay, xorijiy ishchilar va sayyohlarni qabul qilishga tayyor ekanliklarini e'lon qilishdi.

Surat: Baxtor