Dunyoda antibiotiklarga chidamli infeksiyalar xavfi tobora kuchaymoqda, bu esa insonlar salomatligi va umumiy epidemiologik vaziyat uchun jiddiy tahdid solmoqda. Jahon sog‘liqni saqlash tashkiloti bosh direktori Tedros Gebreyesus ma’lum qilishicha, superbakteriyalar har yili butun dunyo bo‘ylab 1,3 million kishining o‘limiga sabab bo‘lmoqda.

Dori vositalariga chidamli bo‘lgan bu mikroorganizmlar ko‘plab kasalliklarni davolashni qiyinlashtiradi yoki butunlay imkonsiz qilib qo‘yadi. Bu o‘lim ko‘rsatkichlarining oshishiga olib keladi va yangi chidamli shtammlarning paydo bo‘lishini tezlashtiradi.

Jahon sog‘liqni saqlash tashkiloti ushbu muammoga qarshi kurashish uchun BMTning mikrobga qarshi kurash bo‘yicha siyosiy deklaratsiyasida belgilangan maqsadlardan foydalanishni rejalashtirmoqda. Tashkilot hukumatlarni bu borada faol harakat qilishga va xalqaro hamkorlikni kuchaytirishga chaqirmoqda.

Mutaxassislarning baholashicha, agar choralar ko‘rilmasa, 2050-yilga kelib dorivorga chidamli infeksiyalar 39 million kishining o‘limiga sabab bo‘lishi mumkin, yana 169 million o‘lim holati esa yo‘ldosh kasalliklar bilan bog‘liq bo‘ladi.