Poytaxtda ichki ishlar organlarida xizmat qilayotgan ayollar o‘rtasida “Eng yaxshi kitobxon xodima” tanlovi o‘tkazildi. Musobaqada 21 nafar xodima ishtirok etib, o‘zbek va jahon adabiyoti bo‘yicha bilimlarini namoyish etishdi.

Tanlov uch bosqichda o‘tkazildi. Birinchi bosqichda ishtirokchilar tasodifiy tanlangan 39 ta badiiy asardan birining mazmun-mohiyatini sharhlashdi. Ikkinchi bosqichda mashhur yozuvchi va mutafakkirlar haqidagi bilimlari sinovdan o‘tkazildi, uchinchi sinovda esa tayyorgarliksiz uchta savolga tezkor javob berish talab etildi.

Barcha bosqichlar yakuniga ko‘ra g‘oliblar aniqlandi. Birinchi o‘rinni Uchtepa tumani 3-sonli IIB vakili katta leytenant Gulora Xo‘jayeva egalladi. Ikkinchi o‘rin Olmazor tumani 4-sonli IIB katta leytenanti Onorxol Ismoilovaga nasib etdi. Uchinchi o‘rinni Mirzo Ulug‘bek tumani 1-sonli IIB xodimasi, leytenant Mohinur Soliyeva hamda Yangihayot tumani IIO JKB xodimasi, leytenant Farangiz Toshpo‘latova bo‘lishib olishdi.

G‘oliblarga diplom va pul mukofotlari topshirildi.