Toshkent viloyatining Bo‘stonliq tumanidagi ko‘rkam “Yoshlar oromgohi” oromgohida 26 maydan 1 iyunga qadar “Yoshlar ekologik oromgohi” (“Eko-2025”) o‘tkaziladi.Forum dolzarb ekologik muammolar va ularni bartaraf etishning samarali strategiyalarini ishlab chiqishga bag‘ishlanadi.

Tadbir Ekologiya, atrof-muhitni muhofaza qilish va iqlim o‘zgarishi vazirligi, Yoshlar ishlari agentligi, Turizm qo‘mitasi va Toshkent viloyati hokimligi hamkorligida tashkil etildi.

Ekologik oromgohdan ko‘zlangan asosiy maqsad – navqiron avlodning ekologik madaniyatini yuksaltirish, fuqarolarning ekologik huquq va manfaatlarini himoya qilish, yosh mutaxassislarning ilmiy va innovatsion salohiyatini rag‘batlantirishdan iborat. Ishtirokchilar dolzarb ekologik muammolarni hal qilishga qaratilgan takliflar ustida ish olib boradi. Oromgohning o‘tkazilishi O‘zbekiston Respublikasi Prezidentining “O‘zbekiston – 2030” strategiyasini “Atrof-muhitni muhofaza qilish va yashil iqtisodiyot yili”da amalga oshirishga oid Davlat dasturi to‘g‘risida”gi qarori ijrosi doirasida amalga oshirilayotgan ishlarga to‘la mos keladi.

Ekologik oromgohda O‘zbekistonning har bir viloyatidan 15 nafar yosh yetakchi ishtirok etadi. Ular orasida “Yosh ekologlar” harakati Kengashlari a’zolari, faol ko‘ngillilar, ekologiya faollari, “Ekologiya mutaxassislari” tanlovi g‘oliblari bor.

Ishtirokchilar uchun boy va rang-barang dastur tayyorlandi. U asosiy ekologik muammolar va ularni hal qilish usullari bo'yicha o'quv seminarlarini, intellektual o'yinlarni, ommaviy sport musobaqalarini va mashhur plogging tadbirlarini (yugurish paytida axlat yig'ish) o'z ichiga oladi. Shuningdek, ekologik loyihalar taqdimoti, turli tanlovlar, madaniy-ko‘ngilochar tadbirlar, taniqli jamoat arboblari va olimlar bilan uchrashuvlar, tarixiy obidalarga ma’rifiy ekskursiyalar tashkil etiladi.

Ekologik oromgoh yakunlariga ko‘ra, eng faol jamoalar va eng yaxshi natija ko‘rsatgan viloyatlar vakillari diplom va qimmatbaho esdalik sovg‘alari bilan taqdirlanadi. Bundan tashqari, har bir ishtirokchiga ushbu muhim ekologik forumdagi ishtirokini tasdiqlovchi maxsus sertifikat beriladi.