Toshkentda “Yashil Makon” milliy dasturi doirasida bosh rejalashtirish va innovatsion moliyaviy yechimlar masalalariga bag‘ishlangan maslahat seminari o‘tkazildi. Tadbirda Ekologiya vazirligi, BMTTDning, BMT YeIKning, BMT QOKBning vakillari, shuningdek, shaharsozlik va ekologik siyosat sohasidagi mutaxassislar ishtirok etdilar.

Seminarning maqsadi loyihani samarali amalga oshirish uchun xalqaro tajriba, ilmiy tadqiqotlar va mahalliy ehtiyojlarni uyg‘unlashtirgan dasturning bosh rejasini muhokama qilishdan iborat edi. Ekologik tashabbuslar doirasida daraxtlarni ekish va parvarish qilish, zararkunandalarga qarshi kurashish, o‘rmonlarni kengaytirish hamda daromad olish uchun yangi imkoniyatlar yaratishga alohida e’tibor qaratildi.

Ekologiya vazirligi vakillari “Yashil Makon” platformasini takomillashtirish haqida ma’lumot berdilar. Bu platforma daraxt ekish jarayonini nazorat qilish, ularni ro‘yxatga olish va jamoatchilik nazoratini kuchaytirish imkonini beradi. “100 yillik daraxtlar” va “Yashil bog‘lar” kabi yangi modullarni joriy etish rejalashtirilmoqda. Ushbu o‘zgarishlar dasturning shaffofligini va samaradorligini oshirishga qaratilgan.

Ishtirokchilar, shuningdek, uglerod kreditlarini jalb qilish va loyihani barqaror rivojlantirish uchun raqamli texnologiyalardan foydalanish masalalarini muhokama qildilar. “Yashil makon” nafaqat ekologik vaziyatni yaxshilashga xizmat qilishi, balki mahalliy aholi uchun ijtimoiy va iqtisodiy imkoniyatlar ham yaratishi ta’kidlab o‘tildi.