Toshkent shahrining Uchtepa tumanidagi Farhod dehqon bozorida fuqarolar Veterinariya-sanitariya ekspertizasi laboratoriyasidan sertifikat olmagan holda sut mahsulotlari va dudlangan baliq sotayotganligi aniqlandi. Ushbu mahsulotlar, jumladan 30 litr sut va 10 kilogramm baliq musodara etildi.

Xuddi shunday tekshiruv Yunusobod tumanidagi bozorda ham o‘tkazilib, u yerda noma’lum sharoitlarda tayyorlangan 30 kilogramm turli xil shirinliklar va 41 kilogramm qiyma topildi. Mahsulotlar yaroqsiz deb topilib, yo‘q qilindi.

Bundan tashqari, Yashnobod tumani bozoridan sifat tekshiruvidan o‘tmagan 30 dona kolbasa, 6 kilogramm pishloq va 10 litr kefir olib qo‘yilib, sotuvdan chiqarildi.

Tadbirlar Yashnobod tumani sanitariya-epidemiologiya bo‘limi va Veterinariya-sanitariya ekspertizasi laboratoriyasi xodimlari ishtirokida o‘tkazildi. Sotuvchilarga qoidabuzarliklar haqida ma’lumot berildi va bozorlar ma’muriyatiga tegishli ogohlantirishlar yuborildi.