Xitoy shimolida kuchli yomg‘ir yog‘ib, halokatli suv toshqinlari va ko‘chkilarga sabab bo‘ldi. So‘nggi ma’lumotlarga ko‘ra, tabiiy ofat oqibatida kamida 40 kishi halok bo‘lgan. Birgina Pekinda 30 nafar aholi halok bo‘ldi, ulardan 28 nafari tog‘li Miyun viloyatida, yana ikki nafari Yansinda. 80 mingdan ortiq odam xavfli zonalardan evakuatsiya qilingan.

Eng ko‘p zarar ko‘rgan hududlar poytaxt chekkasi: Fangshan, Xuayru va ayniqsa Miyun shaharlari bo‘ldi, bu yerda xuddi shu nomdagi suv omboridagi suv darajasi 1959-yilda yaratilganidan beri maksimal darajaga yetdi.Poytaxtning ayrim hududlarida bir necha kun ichida 800 mm gacha yog‘ingarchilik qayd etildi – bunday qiymatlar ekstremal deb hisoblanadi. Magistral yo‘llarning o‘nlab uchastkalari shikastlangan, 136 qishloq elektr ta’minotisiz qolgan.

Suv toshqini qo‘shni Xebey provinsiyasiga ham ta’sir ko‘rsatdi, Chengde shahri yaqinidagi qishloqda ko‘chki oqibatida sakkiz kishi halok bo‘ldi, to‘rt kishi bedarak yo‘qoldi.

Tabiiy ofat fonida Xitoy rahbari Si Tszinpin mahalliy hokimiyatni zudlik bilan javob berishga, fuqarolarning hayoti va mulkini himoya qilishga chaqirdi. U zudlik bilan evakuatsiya qilish, qutqaruv xizmatlarini safarbar qilish, gidrotexnika inshootlarini nazorat qilish zarurligini ta’kidladi. Xitoy Xalq Respublikasi Davlat kengashi Bosh vaziri Li Tsyan ob-havo sharoiti monitoringini kuchaytirish va favqulodda vaziyatlarga tayyorgarlik ko‘rish bo‘yicha topshiriq berdi.

Favqulodda vaziyatlar vazirligi favqulodda vaziyatlarni bartaraf etishning eng yuqori darajasi – to'rtinchi darajani joriy qildi. Aholiga daryolarga yaqin boʻlmaslik va ehtiyot choralarini koʻrish tavsiya etiladi. Falokat hududiga yordamni muvofiqlashtirish uchun ishchi guruhlar yuborilgan.