Министрлер Кабинетинин Төрагасынын орун басары – Суу чарба, айыл чарба жана кайра иштетүү өнөр жай министри Бакыт Төрөбаев Астана шаарына (Казакстан Республикасы) жумушчу сапарынын алкагында Казакстандын Премьер-министринин орун басары – Улуттук экономика министри Серик Жумангарин менен жолугушту. Бул тууралуу министрлер кабинети билдирди.

Жолугушуунун жүрүшүндө эки тараптуу кызматташуунун негизги маселелери талкууланды. Тараптар эки өлкөнүн ортосундагы экономикалык байланыштарды кеңейтүүгө жана тереңдетүүгө багытталган бир катар маанилүү макулдашууларга жетишти, атап айтканда:

– Кыргызстандын айыл чарба продукциясын Казакстанга экспорттоо үчүн “жашыл коридор” түзүү;

– мунай менен камсыздоо боюнча биргелешкен иш;

– миграциялык эрежелерди жөнөкөйлөтүү боюнча жумушчу топту түзүү.

Жетишилген макулдашуулардын алкагында «Кыргыз Агрохолдинг» ААКсы Соода комитети жана Казакстандын «Казтрейд» ААКсы менен биргеликте «жашыл коридордун» алкагында экспортко чыгарылуучу айыл чарба продукцияларынын тизмесин жана көлөмүн аныктоо боюнча тыгыз кызматташат.

Тараптар ошондой эле Казакстанга айыл чарба продукцияларын, анын ичинде сезондуктарды жеткирүү боюнча эки тараптуу кызматташуу маселелерин талкуулашты. Социалдык маанидеги товарларды Казакстандын аймагы аркылуу экспорттоо/транзиттөө учурунда магистралдык темир жол тармагынын кызмат көрсөтүүлөрү үчүн тарифтик жеңилдиктерди казак тараптын мүмкүн колдонуу маселесине көңүл бурулду.

Бакыт Төрөбаев менен Серик Жумангарин Кыргызстан менен Казакстандын элдеринин гүлдөп-өсүшүнө багытталган мурда жетишилген макулдашууларды жана стратегиялык демилгелерди ишке ашыруу үчүн жигердүү иштөөгө жана бардык күч-аракетин жумшоого өз ара даяр экендиктерин баса белгилешти. Бул демилгелерди эки мамлекеттин лидерлери аныкташкан.