Бишкек, 2026-жылдын 21-октябры – Karavan Info маалымат агенттиги. Д.А. Кунаев атындагы тоо-кен институтунун делегациясы 14–16-октябрда Бишкекте өткөн "Өнүгүү үчүн өнөктөштүк" аттуу экинчи эл аралык тоо-кен форумуна катышты. Форумда тоо-кен маселелери боюнча Борбордук Азия илимий-техникалык кеңешин түзүү сунушталды.

Катышуучулар геологиялык чалгындоону санариптештирүү, жашыл технологияларды ишке ашыруу жана инженердик окутуу маселелерин талкуулашты. Кыргызстандагы илимий уюмдар жана жер казынасын пайдалануучу компаниялар менен кызматташуу боюнча макулдашууларга жетишилди. Бир катар биргелешкен жумушчу жолугушууларды өткөрүү пландаштырылууда.

Институттун директору Ержан Утешов: "Биз топтолгон тажрыйбадан конкреттүү демилгелерге өтүүнү сунуштайбыз. Тоо-кен маселелери боюнча Борбордук Азия илимий-техникалык кеңешин түзүүнү сунуштайбыз", – деди. Ал кеңеш тажрыйба алмашуу жана биргелешкен чечимдер үчүн туруктуу платформага айланаарын билдирди.

Сүрөт : Казакстан Республикасынын Өнөр жай жана курулуш министрлиги