2024-жылдын 12-июлунда Казакстандын Президенти Касым-Жомарт Токаев Бириккен Араб Эмираттарынын республикадагы элчиси Мохаммед Саид Мохаммед аль-Арики менен жолугушту.
Мамлекет башчысы БАЭ өкүлдөрүнө Астанада өткөн Шанхай кызматташтык уюмунун саммитине катышкандыгы үчүн ыраазычылык билдирди.
Казакстандын президентинин басма сөз кызматы билдиргендей, тараптар буга чейин соода-экономикалык жана инвестициялык тармактарда жогорку деңгээлде жетишилген макулдашууларды ишке ашырууну талкуулашты. Ошондой эле Казакстан Республикасы менен БАЭ ортосундагы стратегиялык инвестициялык долбоорлор боюнча биргелешкен декларациянын алкагында ишти улантуу зарылчылыгы айтылды.
Мындан тышкары, жолугушуунун катышуучулары энергетика, транспорт жана логистика тармактарында, маалыматтык технологиялар жана жасалма интеллект тармактарында кызматташуунун келечегин карап чыгышты.
2023-жылдын май айынын аягында Казакстандын президенти Абу-Даби Эмиратынын башкаруучу үй-бүлөсүнүн улук өкүлү шейх Сурур бин Мохаммед Аль Нахайян менен жолугушту.
Жолугушууда эки тараптуу кызматташтыкты чыңдоо маселелери талкууланды.
Сүйлөшүүлөрдүн соңунда Касым-Жомарт Токаев шейхке эки тараптуу мамилелерди чыңдоого жана өнүктүрүүгө кошкон зор салымы үчүн 1-даражадагы «Достык» орденин тапшырды.
«Жылдын башында Эмираттарга болгон иш сапарымда жана сиздердин өлкөнүн жетекчилиги менен болгон сүйлөшүүлөрдү абдан канааттануу менен эстейм. Албетте, жетишилген макулдашуулар биздин элдерибиздин жыргалчылыгына кызмат кылат. Казакстан үчүн Бириккен Араб Эмираттары ислам дүйнөсүндөгү ишенимдүү жана негизги стратегиялык өнөктөш, Эгемендүүлүктүн алгачкы жылдарынан бери бизди колдоп келген боордош өлкө. Муну элибиз ар дайым баалайт. Ошондуктан, биз БАЭнин өлкөбүздүн өнүгүшүнө кошкон салымын достуктун жана тыгыз кызматташтыктын ачык-айкын көрүнүшү деп эсептейбиз.
Мүмкүнчүлүктөн пайдаланып, өлкөңүздүн жетекчилигине ыраазычылык билдирип, БАЭнин президенти шейх Мохаммед бин Заид Аль Нахайянга жылуу каалоолорумду билдиргим келет», – деди Касым-Жомарт Токаев.
Фото: Казакстан Республикасынын Президентинин басма сөз кызматы