Согди облусунун төрагасы Раджаббой Ахмадзода менен Кытайдын China Datang корпорациясынын Борбордук Азиядагы башкы директору Ван Хаонун жолугушуусу болду.

Тараптар Согди облусунда 500 мегаватт кубаттуулуктагы күн электр станциясын кытайлык компания куруу мүмкүнчүлүгүн талкуулашты.

Раджаббой Ахмадзода энергетика тармагында, анын ичинде “жашыл энергияны” өндүрүүдө кызматташууну түзүүгө даяр экенин билдирди.

Облус башчысы облустун экономикалык абалы жана колдо болгон ресурстар жана мүмкүнчүлүктөр тууралуу маалымат берип, ошондой эле Кытайдын өндүрүш ишканалары менен кызматташууну бекемдөөгө даяр экендигин билдирди.

Учурда аймак дүйнөнүн көптөгөн мамлекеттери менен кызматташып, быйылкы жылдын алты айында тышкы соода жүгүртүү 1,4 миллиард доллардан ашты.

Эскертүү. China Datang Corporation 2002-жылы негизделген, Кытайдагы эң ири электр берүүчү компаниялардын бири. Өлкөдө жашыл энергетиканы өнүктүрүп, күн батареяларын чыгарат.

Сүрөт: sugd.tj