Душанбе, 15 сентябр, – АИ «Корвон Иттилоот».   Аз 23 то 26 сентябр дар шаҳри Душанбе 81-умин ҷаласаи Шӯрои роҳбарони хизматҳои гумрукии давлатҳои узви Иттиҳоди Давлатҳои Мустақил (ИДМ) баргузор мешавад.

Дар ҷараёни ҷаласаи оянда иштирокчиён масъалаҳои муҳимро баррасӣ хоҳанд кард, ки ба тақвияти ҳамкории байни органҳои гумрукӣ, беҳтар намудани равандҳои гузариши сарҳадӣ, соддагардонии амалиёти тиҷоратӣ ва баланд бардоштани самаранокии назорати гумрукӣ равона шудаанд. Таваҷҷуҳи махсус ба ҳамоҳангсозии санадҳои меъёрӣ, мубодилаи таҷриба дар соҳаи рақамигардонии равандҳои гумрукӣ ва мубориза бо контрабанда ва вайронкунии қонунҳои гумрукӣ дода мешавад.

Пеш аз баргузории ҷаласаи асосӣ дар Душанбе нишасти кории коршиносони Шӯрои роҳбарони органҳои гумрукӣ дар назар аст, ки дар он тавсияҳо ва лоиҳаҳои қарорҳо барои муҳокима дар сатҳи олӣ омода хоҳанд шуд.

Дар доираи чорабинӣ ҳамчунин 51-умин нишасти муштараки хизматҳои гумрукии кишварҳои узви Иттиҳоди иқтисодии Авруосиё баргузор мешавад. Тавассути нишастҳо қарор аст чораҳои соддагардонии идораи гумрукӣ, татбиқи технологияҳои муосир барои суръат бахшидани раванди расмиёти бор ва рушди барномаҳои муштараки омӯзиш ва мубодилаи таҷрибаи касбӣ байни кормандони гумрук баррасӣ карда шавад.

Ғайр аз барномаи корӣ, иштирокчиён имконият пайдо хоҳанд кард, ки бо объектҳои таърихӣ, фарҳангӣ ва сайёҳии Тоҷикистон шинос шаванд, ки ин барои тақвияти робитаҳои фарҳангӣ ва мубодилаи таҷриба дар соҳаи сайёҳӣ ва мероси фарҳангӣ мусоидат мекунад.

Ин чорабинӣ ба рушди минбаъдаи равандҳои ҳамгироӣ дар минтақа ва баланд бардоштани сатҳи ҳамкории гумрукӣ мусоидат намуда, заминаи рушди савдо ва суботи иқтисодии кишварҳои ИДМро фароҳам меорад.

НИАТ «Ховар»
Акс аз бойгонӣ