Душанбе, 15 сентябр, – АИ «Корвон Иттилоот».   26 сентябр соати 09:00 иҷлосияи сессияи сеюми Маҷлиси вакилони халқии шаҳри Душанбе даъвати ҳафтум баргузор мешавад. Дар ин бора аз Вазорати иттилооти дастгоҳи Раиси шаҳри Душанбе хабар доданд.

Дар рӯзномаи сессия масъалаҳои татбиқи «Барномаи давлатии ҳамаҷонибаи рушди тарбияи экологӣ ва таблиғи донишҳои экологии аҳолии Ҷумҳурии Тоҷикистон барои солҳои 2021–2025» ва ҷараёни иҷрои Нақшаи чорабиниҳои мақомоти иҷроияи ҳокимияти давлатии шаҳри Душанбе дар ин самт ворид гардидаанд. Баррасии ин масъалаҳо ба баланд бардоштани огоҳии экологӣ, тақвияти амалҳои рушди устувор ва такмили фаъолияти омӯзишӣ дар соҳаи экология равона карда шудааст.

Ҳамчунин дар ҷараёни иҷлосияи «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020–2025» ва ҷараёни иҷрои Нақшаи чорабиниҳои дахлдори мақомоти иҷроияи ҳокимияти давлатии шаҳри Душанбе баррасӣ хоҳад шуд.

Таваҷҷуҳи асосӣ ба таъмин намудани дастрасӣ ва сифати таҳсилоти томактабӣ, рушди инфрасохтор ва такмили усулҳои таълим барои кӯдакони синни томактабӣ равона мегардад.

Иҷлосия дар доираи кори мунтазами Маҷлиси вакилони халқӣ баргузор шуда, ба назорати татбиқи барномаҳои давлатӣ ва баланд бардоштани самаранокии фаъолияти мақомоти худидоракунии маҳаллӣ равона шудааст.

Акс аз бойгонӣ