Қырғызстанда өңдеу өнеркәсібінде тұрақты өсім байқалады. Бұл туралы министрлік ұйымдастырған «Агроөнеркәсіптік кешеннің басым секторларына инвестиция тарту» инвестициялық форумында Премьер-Министрдің орынбасары – Су ресурстары, ауыл шаруашылығы және өңдеу өнеркәсібі министрі Бақыт Төребаев мәлім етті.

Оның айтуынша, бүгінде Қырғызстан өнімдері әлемнің 80-нен астам еліне экспортталады, ал экспорт қоржынында 60-тан астам тауар бар.

«2024 жылы экспорттың жалпы көлемі 39 миллиардқа жуық соманы құрады, ал биылғы жылдың соңына дейін біз бұл көрсеткішті 70 миллиард сомға жеткізуді жоспарлап отырмыз», — деді Төребаев.

Бүгін Бішкекте Су ресурстары, ауыл шаруашылығы және өңдеу өнеркәсібі министрлігінің бастамасымен «WAPinvest 2025» форумы өтуде. Шара еліміздің экспорттық әлеуетін кеңейтіп, ауыл шаруашылығы саласына инвестиция тартуды көздейді.