Душанбе, 20 сентябр, – АИ «Корвон Иттилоот». Дар ду даҳсолаи охир Тоҷикистон ҳамчун яке аз ташаббускорони асосии ҷаҳонӣ дар самти об, иқлим ва ҳифзи пиряхҳо эътироф шудааст. Ин иқдомҳо кишварҳои узви Созмони Милали Муттаҳид, сохторҳои байналмилалӣ, доираҳои илмӣ ва ҷомеаи шаҳрвандиро ба ҳам оварда, роҳҳои ҳалли мушкилоти экологиро ҷустуҷӯ менамоянд.

Президенти Ҷумҳурии Тоҷикистон муҳтарам Эмомалӣ Раҳмон 17 сентябр зимни вохӯрӣ бо кормандони Кумитаи ҳифзи муҳити зист назди Ҳукумати Ҷумҳурии Тоҷикистон таъкид намуданд: «Бо ташаббуси Тоҷикистон то имрӯз Маҷмаи Умумии Созмони Милали Муттаҳид 14 қатънома оид ба масъалаҳои об ва иқлим қабул намудааст, ки заминаи амалӣ намудани ҳадафҳои мушаххас, аз ҷумла “Рӯзномаи рушди устувор то соли 2030”-ро фароҳам овард».

Дар шаҳри Душанбе даҳҳо чорабиниҳои сатҳи баланд оид ба дипломатияи об ва мушкилоти иқлим баргузор шудаанд. Яке аз муҳимтарини онҳо Соли байналмилалии ҳифзи пиряхҳо буд, ки моҳи майи соли 2025 бо Конфронси байналмилалии сатҳи баланд таҷлил гардид. Дар он намояндагони 90 кишвари ҷаҳон, сарони давлатҳо, ташкилотҳои байналмилалӣ ва минтақавӣ, марказҳои илмӣ ва шарикони рушд ширкат доштанд.

Ҳуҷҷати асосии конфронс — Қатъномаи душанбегии ҳифзи пиряхҳо — ҳамчун санади расмии Маҷмаи Умумии СММ миёни кишварҳои узв паҳн гардид. Дар он чунин нуктаҳо таъкид шудаанд:

• зарурати ворид намудани масъалаи ҳифзи пиряхҳо ба рӯзномаи ҷаҳонӣ;
• идомаи Раванди Душанбе;
• ҷалби маблағҳои байналмилалӣ барои ҳифзи пиряхҳо.

Дар доираи ҳамоиши Душанбе Бонки Рушди Осиё ва Сандуқи Сабзи Иқлим барномаи бузурги «Аз пиряхҳо то хоҷагиҳо»-ро бо ҳаҷми умумии 3,5 миллиард доллари ИМА муаррифӣ карданд.

Ин барнома дар 9 кишвари минтақа амалӣ мегардад:
Тоҷикистон, Арманистон, Гурҷистон, Қазоқистон, Қирғизистон, Озарбойҷон, Покистон, Туркманистон ва Ӯзбекистон.

Қадами мазкур саҳми муҳиме дар мубориза бо тағйирёбии иқлим ва рушди устувори Осиёи Марказиву Ҷанубӣ арзёбӣ мегардад.

Сурат: АМИТ «Ховар»