Душанбе, 25 ноябр, – АИ Корвон Иттилоот. 24 ноябр дар шаҳри Душанбе ба ифтихори Рӯзи Парчами давлатии Ҷумҳурии Тоҷикистон роҳпаймоиии идона баргузор гардид, ки дар он зиёда аз 20 ҳазор нафар иштирок карданд. Ин чорабинӣ на танҳо як ҷашни оммавӣ, балки намунаи равшани ҳамбастагии ҷомеа гардид.
Дар роҳпаймоӣ кормандони дастгоҳи Раиси шаҳри Душанбе, намояндагони мақомоти иҷроияи ҳокимияти давлатии шаҳр ва ноҳияҳо, вазорату идораҳо, муассисаҳои ҷумҳуриявӣ, ташкилотҳои соҳаҳои маориф, тандурустӣ, фарҳанг, омӯзгорону донишجویни муассисаҳои таҳсилоти олӣ, варзишгарон ва фаъолони ҷамъиятӣ ширкат варзиданд.
Таъкид карда шуд, ки сокинони Душанбе ин рӯзи муборакро ҳамасола бо дастовардҳои тоза ва эҳсоси масъулият нисбат ба давлат истиқбол мегиранд. Парчами давлатӣ рамзи устувории давлат, истиқлол, ваҳдат ва худшиносии миллӣ мебошад ва дар тарбияи насли наврас нақши муҳим мебозад.
Парчам дар фарҳанги давлатӣ решаҳои амиқи таърихӣ дорад. Дар давраҳои бостон аҷдодони тоҷик парчами худро доштанд, ки дар сарчашмаҳои куҳан бо номи «дирафш» зикр мегардид.
Парчами миллӣ имрӯз идомаи мантиқии ҳамин суннати бостонии давлатдорӣ мебошад. Ба шарофати Истиқлолияти давлатӣ ва талошҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, кишвар соҳиби рамзи давлатӣ гардид, ки гузаштаи пурифтихор ва ояндаи дурахшони миллатро таҷассум мекунад.
Рӯзи Парчами давлатӣ аз соли 2009 расман ҷашн гирифта мешавад. Парчам дар қатори Конститутсия, Нишони давлатӣ ва Суруди миллӣ асоси давлатдории миллиро ташкил дода, мавҷудияти миллат ва сохти ягонаи давлатиро инъикос менамояд.
Соли 2011 бо ташаббуси Президенти Ҷумҳурии Тоҷикистон муҳтарам Эмомалӣ Раҳмон ба ифтихори 20-солагии Истиқлолияти давлатӣ дар шаҳри Душанбе флагштоки 165-метрӣ барафрохта шуд, ки он ҳамчун баландтарин флагштоки ҷаҳон ба Книгаи рекордҳои Гиннес ворид гардид.
Ин иншоот ба яке аз рамзҳои ҷаҳонии истиқлол ва давлатдории тоҷикон табдил ёфтааст.
Роҳпаймоиии идона дар Душанбе боз нишон дод, ки Рӯзи Парчами давлатӣ барои ҷомеа танҳо ҷашн нест — ин таҷассумгари ҳувият, ваҳдат ва иродаи миллат барои сохтани ояндаи устувор аст.
АКС: Мақомоти иҷроияи ҳокимияти давлатии шаҳри Душанбе