Душанбе, 30 декабр, 2025- АИ «Корвон Иттилоот». Дар вилояти Хатлон дар мавсими ҷории кишоварзӣ дар 8 ҳазор гектар картошка кишт карда мешавад, ки аҳамияти устувори ин зироатро барои амнияти озуқаворӣ ва иқтисоди минтақа тасдиқ менамояд. Тибқи иттилои хадамоти матбуоти Раиси вилояти Хатлон, корҳои кишт дар як қатор шаҳру ноҳияҳо аллакай бо суръати муайян идома доранд.

Аз ҷумла, дар ноҳияҳои Қубодиён ва Шаҳритус кишти картошка тибқи нақша ҷараён дошта, деҳқонон тавсияҳои мутахассисонро пурра риоя менамоянд. Иҷрои дақиқи қоидаҳои агротехникӣ яке аз омилҳои асосии ба даст овардани ҳосили босифат ва устувор арзёбӣ мешавад.

Олимони соҳаи кишоварзӣ таъкид мекунанд, ки барои парвариши картошкаи барвақтӣ дар ноҳияҳои водигии Тоҷикистон истифодаи тухмии аз минтақаҳои кӯҳӣ овардашуда ё дар тобистон кошташуда мувофиқ аст. Ин гуна лӯндаҳо ба касалиҳо тобовар буда, ҳосилнокии баланд доранд. Ҳангоми кишт интихоб намудани лӯндаҳои солим, беосеб ва дорои вазни миёна — аз 60 то 80 грамм тавсия дода мешавад.

Картошкапарварӣ яке аз самтҳои муҳими соҳаи кишоварзии Тоҷикистон ба шумор меравад. Ин бахш дар таъмини аҳолӣ бо маводи ғизоӣ, фароҳам овардани ҷойҳои кори доимӣ дар деҳот ва афзоиши иқтидори содиротии кишвар нақши назаррас дорад. Ба гуфтаи коршиносон, рушди минбаъдаи соҳа пеш аз ҳама ба ташкили низоми илман асосноки тухмипарварӣ, бахусус дар минтақаҳои кӯҳӣ, вобастагӣ дорад.

Дар байни зироатҳои кишоварзии ҷумҳурӣ картошка аз рӯи ҳаҷми истеҳсол, ҳосилнокӣ ва гуногунии истифода мавқеи намоёнро ишғол менамояд. Қимати баланди ғизоӣ, самараи хуби иқтисодӣ ва мутобиқати он ба шароити гуногуни иқлимӣ парвариши васеи ин зироатро дар заминҳои обӣ таъмин намудааст.

Одатан, ҳосили баландтарини картошка дар заминҳои обёришавандаи минтақаҳои кӯҳии мамлакат ба даст оварда мешавад, ки дар он ҷо иқлими муътадил ва сербориш барои ин зироат мусоид аст. Дар чунин шароит картошка на танҳо манбаи муҳими ғизо, балки омили таъмини даромади иловагӣ барои ҳазорҳо хоҷагиҳои деҳот мегардад.

АКС: khovar.tj