Душанбе, 30 декабр, 2025 – АИ «Корвон Иттилоот». Иқтисоди Ҷумҳурии Тоҷикистон дар соли 2026 суръати баланди рушди Маҷмӯи маҳсулоти дохилиро нигоҳ медорад — тақрибан 8,1 фоиз. Чунин пешбинӣ дар Пешгӯии макроиқтисодии Бонки рушди Евразия зикр гардидааст, ки барои ҳафт давлати узви бонк таҳия шудааст. Дар санади таҳлилӣ вазъи рушди иқтисодии кишварҳои минтақа дар соли 2025 ва дурнамои нишондиҳандаҳои асосии макроиқтисодӣ барои солҳои 2026–2028 баррасӣ мешавад.
Тибқи арзёбиҳои таҳлилгарони БРЕ, иқтисоди ҷаҳонӣ суръати мӯътадили рушдро нигоҳ дошта, тадриҷан ба монеаҳои нави тиҷоратӣ мутобиқ мегардад. Ҳамзамон, рушди иқтисод дар кишварҳои пешрафта суст боқӣ мемонад, дар ҳоле ки иқтисодҳои рӯ ба рушд бо бозорҳои калон фаъолияти баланди иқтисодиро нишон медиҳанд.
Иқтисоди минтақаи амалиёти Бонки рушди Евразия дар соли 2026 ба ҳисоби миёна 2,3 фоиз афзоиш меёбад. Зикр мешавад, ки вазъи иқтисоди ҷаҳонӣ ва бозорҳои ашёи хом барои рушди кишварҳои минтақа монеаи ҷиддӣ эҷод нахоҳад кард, вале ҳамзамон омили асосии афзоиш низ намешавад. Омили калидии рушди устувори аксари кишварҳои минтақа сатҳи баланди фаъолияти сармоягузорӣ боқӣ мемонад.
Интизор меравад, ки равандҳои таваррумӣ дар минтақа тадриҷан коҳиш ёбанд. Дар соли 2026 сатҳи таваррум то 6,3 фоиз паст шуда, нисбат ба 6,9 фоизи соли 2025 коҳиш меёбад, ба шарте ки зарбаҳои иловагии беруна ба миён наоянд. Ин раванд натиҷаи сиёсати мутавозини пулию қарзии бонкҳои марказии кишварҳои узви БРЕ арзёбӣ мешавад.
Дар ин замина Тоҷикистон бо нигоҳ доштани суръати баланди рушди иқтисодӣ фарқ мекунад. Ба ҳайси омилҳои асосии рушд таҳлилгарон васеъшавии иқтидорҳо дар соҳаи энергетика ва саноати коркард, инчунин сатҳи баланди нархҳо ба тилло ва металлҳои ранга дар бозорҳои ҷаҳониро ном мебаранд.
Тибқи пешбинӣ, сатҳи таваррум дар кишвар то охири соли 2026 ба 4,5 фоиз дар ҳисоботи солона мерасад, аммо дар доираи нишондиҳандаи ҳадафнок — 5±2 фоиз — боқӣ мемонад. Суботи қурби асъори миллӣ — сомонӣ — аз ҳисоби афзоиши содирот ва зиёдшавии ҳаҷми интиқоли маблағҳои муҳоҷирони меҳнатӣ таъмин мегардад. Қурби миёнаи сомонӣ дар соли 2026 тақрибан 9,8 сомонӣ барои як доллари ИМА пешбинӣ мешавад.
Дар маҷмӯъ, пешгӯии Бонки рушди Евразия аз устувории модели макроиқтисодии Тоҷикистон ва мавҷудияти манбаъҳои дохилии рушд шаҳодат медиҳад, ки ба кишвар имкон медиҳанд дар шароити рушди маҳдуди иқтисоди ҷаҳонӣ низ суръати баланди пешрафтро нигоҳ дорад.
СУРАТ: вебсайти Centralasianlight