Душанбе, 06 январ, – АИ «Корвон Иттилоот». Мусобиқаи Ҷоми Русия-2025 қаҳрамони асосии худро пайдо кард. Ин унвон ба дарвозабони дастаи «Ростов» ва тими миллии Тоҷикистон Рустам Ятимов насиб гардид, ки тибқи овоздиҳии мухлисон ва коршиносон бозигари сол эътироф шуд. Барои дарвозабони 27-сола ин дастовард танҳо ҷоизаи инфиродӣ нест, балки натиҷаи як мавсими воқеан барҷаста ба ҳисоб меравад.

Ятимов дар овоздиҳӣ бо касби 36 фоизи раъйҳо ғолиб омад ва аз рақиби наздики худ — нимҳимоятгари «Краснодар» Данила Козлов (26%) ба таври назаррас пеш гузашт. Ҷойи сеюмро бозигарони ЦСКА ва «Краснодар» Матвей Кисляк ва Александр Корякин тақсим карданд. Бо вуҷуди ин, маҳз бозии устувори дарвозабони «Ростов» ба тамоми мусобиқа рӯҳу оҳанги хос бахшид.

Роҳи «Ростов» то Суперфинал пур аз лаҳзаҳои ҳассос ва рақобати шадид буд. Дар аксари бозиҳои ҳалкунанда Ятимов нақши калидӣ бозид: эътимод дар хатти дарвоза, аксуламали баланд ва қобилияти дуруст хондани бозӣ борҳо дастаашро аз шикаст наҷот дод. Дар финал «Ростов» танҳо дар силсилаи пеналти аз ЦСКА мағлуб шуд ва ҳатто дар он дидор саҳми дарвозабони тоҷик хеле намоён буд.

Қобили зикр аст, ки қаблан дар ҳамин мавсим Ятимов аллакай беҳтарин дарвозабони Ҷоми Русия тибқи назарсанҷии мухлисон эътироф шуда буд. Унвони бозигари сол ин мақомро боз ҳам мустаҳкам кард.

Муваффақиятҳои ӯ танҳо ба майдони Русия маҳдуд намонданд. Дар охири соли 2025 Рустам Ятимов ба зинаи шашуми феҳристи гаронбаҳотарин дарвозабонони Осиё баромад. Арзиши тахминии ӯ — 1,8 миллион евро — рекорди мутлақ барои футболи Тоҷикистон мебошад. Ӯ намояндагони Индонезия ва Австралияро пушти сар гузошта, гаронбаҳотарин кипери Осиёи Марказӣ гардид.

Қиссаи муваффақияти Рустам Ятимов намунаи равшани он аст, ки бо заҳмат, устуворӣ ва бозии сатҳи баланд метавон дар сатҳи қораӣ мавқеи намоён касб кард. Ҷоми Русия-2025 барои ӯ на танҳо финал, балки рамзи эътирофи комил гардид.

Рустам Ятимов

Фото: AFC.com