Душанбе, 24 октябр, – АИ «Корвон Иттилоот». 21 октябри соли 2026 байни Ҳукумати Ҷумҳурии Тоҷикистон ва Агентии Ҷопон оид ба ҳамкориҳои байналмилалӣ (JICA) Созишномаи грантӣ оид ба лоиҳаи бунёди зеристгоҳ барои низоми магистралии интиқоли неруи барқ дар шаҳри Душанбе ба имзо расонда шуд.

Созишномаро вазири молияи Ҷумҳурии Тоҷикистон Файзиддин Қаҳҳорзода ва роҳбари намояндагии Агентии Ҷопон оид ба ҳамкориҳои байналмилалӣ (JICA) дар Ҷумҳурии Тоҷикистон Ёшимаса Такэмура имзо намуданд.

Тибқи созишнома, зеристгоҳи нави барқии 220/110/10 кВ дар қисмати шарқии пойтахт (наздикии «Боғи Ғалаба») бунёд мегардад.

Татбиқи лоиҳа ба таҳкими инфрасохтори энергетикии шаҳри Душанбе, баланд бардоштани эътимоднокии таъминоти барқ ва қонеъ гардондани талаботи рӯзафзуни аҳолӣ ва корхонаю муассисаҳои пойтахт ба неруи барқ мусоидат хоҳад кард. Бунёди иншооти мазкур ҳамчунин барои баланд бардоштани устувории фаъолияти шабакаҳои барқӣ ва фароҳам овардани иқтидорҳои иловагӣ ҷиҳати пайваст намудани муштариёни нав замина мегузорад.

Имзои созишномаи грантӣ қадами навбатӣ дар густариши ҳамкориҳои Тоҷикистону Ҷопон дар соҳаи энергетика ба ҳисоб меравад.

Бунёди зеристгоҳи нави иқтидори баланд дар қисмати шарқии Душанбе барои рушди низоми энергетикии пойтахт аҳамияти муҳим дорад. Афзоиши аҳолӣ ва васеъшавии инфрасохтори шаҳр тақвияти доимии шабакаҳои барқиро талаб мекунад. Дастгирии JICA имкон медиҳад, ки лоиҳа дар асоси грантӣ амалӣ шавад, ки бори молиявиро ба буҷети давлатӣ кам карда, навсозии инфрасохтори муҳимро суръат мебахшад. Ин ҳамкорӣ хати муомилаи амалии ду кишварро дар бахши энергетика идома медиҳад.

Акс: Вазорати энергетика ва захираҳои оби Ҷумҳурии Тоҷикистон (@mewrtj)