Душанбе, 2 феврали соли 2026 — Агентии иттилоотии Karavan Info. 29 январи соли ҷорӣ Созмони Байналмилалии Муҳоҷират (СБМ) дар доираи лоиҳаи "Муҳоҷирати бехатари коргарони мавсимӣ аз Осиёи Марказӣ ба Британияи Кабир", семинари ниҳоии омӯзиширо барои аъзои гурӯҳи кории кормандони Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон, инчунин намояндагони Марказҳои машваратӣ ва омӯзиши пеш аз сафар барои муҳоҷирони меҳнатӣ баргузор кард.

Омӯзиш барои баланд бардоштани салоҳияти касбии мутахассисоне, ки мустақиман бо муҳоҷирони меҳнатӣ ва оилаҳои онҳо кор мекунанд, равона карда шуда буд. Дар семинар ба иштирокчиён маълумот дар бораи тартиби машварати иттилоотӣ, усулҳои муассири интиқоли иттилоот ва қоидаҳои будубоши қонунии муҳоҷирон дар кишварҳои мизбон, аз ҷумла Британияи Кабир, пешниҳод карда шуд.

Таваҷҷуҳи махсус ба масъалаҳои коҳиш додани хатарҳои муҳоҷират, аҳамияти омодагии пеш аз сафар ва нақши маълумоти боэътимод дар таъмини ҳифзи ҳуқуқ ва манфиатҳои муҳоҷирони меҳнатӣ зоҳир карда шуд.

Пас аз анҷоми тренинг, аъзои гурӯҳи кории Хадамоти муҳоҷират ва Маркази машваратӣ дар моҳи феврали соли 2026 барои муҳоҷирони меҳнатӣ ва аъзои оилаҳои онҳо машваратҳои иттилоотӣ баргузор мекунанд. Ин як қадами муҳим барои баланд бардоштани огоҳии ҷомеа ва рушди муҳоҷирати меҳнатии бехатар ва қонунӣ хоҳад буд.

АКС: Созмони байналмилалии муҳоҷират (IOM) дар Тоҷикистон