АФҒОНИСТОН, 4 феврали соли 2026 – Хабаргузории Karavan Info. Вазорати корҳои хориҷии Толибон хабар дод, ки Амирхон Муттақӣ дар Кобул бо роҳбари нави намояндагии дипломатии Туркия Садин Ай Йилдиз мулоқоти муаррифӣ баргузор кардааст.
Вазорати корҳои хориҷии Толибон гуфт, ки Амирхон Муттақӣ Ҷумҳурии Туркияро дӯсти наздики Афғонистон номид ва муносибатҳои дуҷонибаро дар ҳоли рушд арзёбӣ кард.
Ба гуфтаи Толибон, сафири Туркия Йилдиз низ ба навбати худ муносибатҳои ду кишварро мусбат арзёбӣ карда, зарурати густариши ҳамкорӣ дар соҳаҳои иқтисодӣ ва тиббиро таъкид кардааст.
Пас аз ба қудрат расидани Толибон, Анқара сафорати худро дар Кобул набаст. Ғайр аз ин, Туркия дафтари сиёсии Афғонистонро дар Анқара ба Толибон супурд, аммо то ҳол ҳукумати онҳоро расман эътироф накардааст.
Акс: Хадамоти матбуоти Вазорати корҳои хориҷии Афғонистон