Душанбе, 25 май, – АИ «Корвон Иттилоот». Дар футболи Тоҷикистон рӯйдоде ба амал омад, ки бисёре аз коршиносон онро рамзи тағйири тавозуни қувваҳо дар футболи миллӣ арзёбӣ мекунанд. Дастаи Регар-ТадАЗ бори аввал дар таърихи худ соҳиби Суперҷоми Тоҷикистон гардид ва ба ҳукмронии чандсолаи бошгоҳи Истиклол нуқта гузошт.

Дар бозии финалӣ барои ба даст овардани ҷом дастаи Турсунзода шоми 23 май дар Варзишгоҳи марказии Ҳисор тими душанбегиро бо ҳисоби 2:1 шикаст дода, бозии муназзам, боинтизом ва устувори равонӣ нишон дод.

Ин пирӯзӣ барои «Регар-ТадАЗ» аҳамияти махсус дорад, зеро даста на танҳо бори аввал соҳиби Суперҷом шуд, балки нишон дод, ки рақобат дар футболи Тоҷикистон тадриҷан шадидтар мегардад. Солҳои охир маҳз «Истиклол» ҳамчун қувваи асосии футболи миллӣ шинохта шуда, мунтазам дар мусобиқаҳои дохилӣ пирӯз мегардид ва кишварро дар арсаи байналмилалӣ намояндагӣ мекард.

Ҷолиб он аст, ки соли гузашта низ ҳамин ду даста дар бозӣ барои Суперҷом бо ҳам рақобат карда буданд. Он вақт «Истиклол» дар силсилаи пеналтӣ пирӯз шуда, бори 13-ум соҳиби трофей гардида буд.

Аммо финали имсола нишон дод, ки бошгоҳҳои минтақаҳо тадриҷан фосиларо бо гранди пойтахт кам мекунанд. Ба гуфтаи коршиносон, муваффақияти «Регар-ТадАЗ» бозгӯи афзоиши рақобат, беҳтар шудани омодасозии футболбозон ва болоравии сатҳи ҳавасмандии бошгоҳҳои ғайрипойтахтӣ мебошад.

Барои дастаи Турсунзода ин пирӯзӣ метавонад на танҳо дастоварди таърихӣ, балки такони ҷиддии равонӣ барои идомаи мавсим гардад. Ғалаба бар пурунвонтарин бошгоҳи кишвар дар бозӣ барои трофеи миллӣ ҳатман сатҳи эътимод ва таваҷҷуҳи мухлисонро боло мебарад.

Суперҷоми Тоҷикистон ҳамеша оғози рамзии мавсими нави футбол маҳсуб мешавад ва натиҷаи имсола нишон медиҳад, ки мубориза барои пешсафӣ дар футболи кишвар минбаъд боз ҳам шадидтар ва пешгӯинашаванда хоҳад шуд.

АКС: Федератсия футбола Таджикистана