Душанбе, 25 май, – АИ «Корвон Иттилоот». Дар маркази вилояти Хатлон — шаҳри Бохтар ба муносибати Рӯзи ҷавонони Тоҷикистон ва Рӯзи ҷаҳонии футбол чорабинии бошукӯҳи идона баргузор гардид. Ин ҷашн ҷавонон, варзишгарон, намояндагони мақомоти маҳаллӣ ва сокинони шаҳрро гирди ҳам оварда, бори дигар нишон дод, ки ҷавонон ва варзиш дар ҷомеаи имрӯза ҷойгоҳи муҳим доранд.
Дар ин ҳамоиши идона муовини раиси вилояти Хатлон Абдулло Раҳмонзода, сардори Раёсати кор бо ҷавонон ва варзиши вилояти Хатлон Рамазон Насриддинзода, раиси шаҳри Бохтар Абдулмаҷид Муминзод, ҷавонону варзишгарон ва сокинони шаҳр иштирок намуданд.
Чорабинӣ бо боздиди меҳмонон аз намоиши дастовардҳои варзишгарон ва ҷавонони ҳунарманди шаҳр оғоз гардид. Меҳмонон бо маҳсули фаъолият, эҷодиёт ва дастовардҳои варзишии онҳо аз наздик шинос шуда, аз нерӯи созандаи насли ҷавон огоҳ гардиданд.
Дар қисмати расмии чорабинӣ ба як қатор ҷавонони фаъоли вилоят барои саҳми арзанда дар татбиқи сиёсати давлатии ҷавонон, таҳкими ҳисси ватандӯстиву худшиносии миллӣ, камолоти маънавӣ ва иштироки фаъолона дар корҳои ҷамъиятӣ Сипосномаи раиси вилояти Хатлон тақдим карда шуд.
Ҳамзамон, ғолибони Ҷоми КИ ҲХДТ дар вилояти Хатлон ва Ҷоми раиси шаҳри Бохтар оид ба футболи хурд бо ҷом ва медалҳо қадрдонӣ гардиданд. Ин бахш ба чорабинӣ рӯҳияи варзишӣ бахшида, таваҷҷуҳи ҷомеаро ба рушди варзиши оммавӣ ва тарғиби тарзи ҳаёти солим бештар намуд.
Сипас, паёми табрикии видеоии раиси вилояти Хатлон Давлаталӣ Саид тавассути намолавҳа ба самъи ҳозирин расонида шуд. Ин паём дар рӯҳияи қадршиносӣ аз саҳми ҷавонон ва аҳамияти дастгирии онҳо дар пешрафти ҷомеа садо дод.
Барномаи рангини театрикунонидаи бахши фарҳанги шаҳри Бохтар ва ҳунарнамоии сарояндагону ҳунармандони маъруфи кишвар ба чорабинӣ шукӯҳу шаҳомати хосса бахшида, фазои идонаро боз ҳам фараҳбахш намуд.
Ҷашни Бохтар бори дигар собит кард, ки таваҷҷуҳ ба ҷавонон, дастгирии ташаббусҳои онҳо ва рушди варзиш имрӯз аз муҳимтарин самтҳои ҷомеасозӣ ва таҳкими арзишҳои миллӣ ба ҳисоб меравад.
АКС: Раёсати кор бо ҷавонон ва варзиши вилояти Хатлон